Azərbaycan, Bakı, 21 sentyabr / Trend , müxbir H.Vəliyev /
Bələdiyyə seçkiləri keçiriləcək seçki komissiyaları lazımi kompüter avadanlıqları və rabitə ilə təchiz ediləcək. Bu məqsədlə Rabitə və İnformasiya Texnologiyaları Nazirliyinin "Aztelekom" İstehsalat Birliyi seçki məntəqələrinin etibarlı, müntəzəm telefon rabitəsi və internet şəbəkəsi ilə təminatı üzrə işlər həyata keçirəcək.
Mərkəzi Seçki Komissiyası (MSK) "Seçkilər" informasiya mərkəzinin saytında respublikanın bələdiyyə orqanlarına namizədlərin siyahısını yerləşdirəcək. Saytda axtarış sistemi açılacaq, bunun vasitəsilə ad, soyad, ata adı üzrə, namizədin partiya mənsubiyyəti üzrə, ətraf seçki məntəqələri və s. üzrə axtarış vermək mümkün olacaq.
Səsvermənin gedişi MSK-nın syatında online rejimində açıq olacaq. Bu da seçicilərə MSK-ya seçki dairələrindən daxil olan nəticələri interaktiv izləmək imkanı verəcək.
Hər seçki məntəqəsindən məlumat dairə seçki komissiyasına, sonra isə "Seçkilər" mərkəzinin informasiya şəbəkəsinə ötürüləcək
Səsvermə prosedurunun avtomatlaşdırılması üçün respublikanın Milli Məclisində istifadə edilən "Seçkilər" dövlət avtomatlaşdırılmış informasiya sistemindən (DAİS) istifadə olunacaq.
Proqram təminatı iki moduldan ibarət olacaq: birincisi dairə seçki komissiyasının informasiya məntəqələri, ikincisi informasiya mərkəzinin adminstratorunun iş yerinin avtomatlaşdırılması üçün. Sistemin əsas funksiyaları bunlardır: səsvermənin gedişinin əks etdirilməsi, protokolların kompüterlərin məlumat bazasına daxil edilməsi, kompüterə deputatların və siyasi partiyaların adlarının daxil edilməsi, dairə seçki komissiyalarının yekun protokollarının daxil edilməsi.
MSK-nın məlumatına görə, bələdiyyə seçkiləri dekabrın ortalarında keçiriləcək.
Məqalə müəllifi ilə əlaqə ünvanı: [email protected]