Azərbaycan, Bakı, 18 iyun /Trend, müxbir H.Vəliyev/
Azərbaycanın mobil rabitə operatorlarının bir abonent hesabı üzrə xidmətlərin satışından əldə etdiyi orta aylıq mədaxili (ARPU) 15-17 dollar təşkil edir. Bu barədə rabitə və informasiya texnologiyaları naziri Əli Abbasov Azərbaycan Diplomatiya Akademiyasında çıxışı zamanı bildirib.
Nazirin sözlərinə görə, bu gün mobil rabitə sektoru üzrə hər 100 nəfərə 90-a yaxın mobil telefon düşür ki, bu da dünyadakı orta statistik göstəricidən çoxdur.
Nazirliyin statistikasına görə, 2009-cu ilin yekunları üzrə mobil operatorların ümumi abonent bazası 7,8 milyon təşkil edib ki, bunun da 80,2 faizi aktivdir.
Son iki il ərzində Azərbaycanın mobil rabitə bazarı sürətli artım yaşayır. İldən-ilə əhalinin daha az ödəniş qabiliyyətli təbəqələri arasında rəqabət mübarizəsi güclənir və bir abonent hesabı üzrə orta gəlir göstəricisi azalır. Bu tendensiya operatorları mobil rabitə bazarında gəlirləri yüksəltmək və ARPU göstəricisini artırmağa kömək etmək iqtidarında olan kontent-xidmətləri tətbiq etməyə vadar edir.
Dünyadakı normalara görə, əgər ARPU göstəricisi 10 dollardan az təşkil edirsə, o zaman operator zərərlə işləyir.
Nazirliyin hesablamalarına görə, stasionar rabitə üzrə ARPU göstəricisi 6-7 dollar təşkil edir.
