Azərbaycan, Bakı, 7 sentyabr /Trend, müxbir H.Vəliyev/
Regional Rabitə Birliyinin (RRB) Radiotezlik spektrindən istifadənin tənzimlənməsi məsələləri üzrə Komissiyası analoqdan rəqəmsal televiziyaya keçiddə boşalan tezliklərin GSM-operatorların ehtiyacları üçün istifadə edilməsi məsələsini müzakirə edir. Bu barədə çərşənbə axşamı Dövlət Radiotezliklər İdarəsinin (DRİ) baş mühəndisi İlham Əfəndiyev bildirib.
Məsələ RRB-nin Radiotezlik spektrindən istifadənin tənzimlənməsi və radioelektron vasitələrin elektromaqnit uyğunlaşması məsələləri üzrə Komissiyası və RRB-nin Peyk rabitəsi, televiziya və radio yayımı Komissiyasının birgə iclası zamanı müzakirə olunur.
Əfəndiyevin sözlərinə görə, söhbət üçüncü nəsil simsiz rabitə (3G) üçün nəzərdə tutulan UMTS (Universal Mobile Telecommunications System) standartlarının ehtiyaclarına cəlb edilməsi planlaşdırılan 790 və 860 MHz tezlik resurslarından gedir.
"Bu gün Bakıda müzakirə edilən məsələ mobil rabitə sektorunda 790 və 860 MHz tezliklərinin istifadəsinin məqəsduyğunluğunu nəzərdə tutan kriteriyaları müəyyən etməlidir. Kriteriyalar müəyyən edildikdən sonra yekun sənəd dörd ildə bir dəfə keçirilən ITU 2010 səlahiyyətli konfransının müzakirəsinə təqdim ediləcək. Beləliklə, bununla bağlı müvafiq qərar ITU tərəfindən qəbul ediləcək", - Əfəndiyev deyib.
İndi rəqəmsal televiziyanın ehtiyacları üçün istifadə olunan tezlik diapazonları bir kanal vasitəsilə 10 proqramı yayımlamağa imkan verir. Bu, DRİ-nin baş mühəndisinin fikrincə, televiziya proqramlarının sayını on dəfə artırmağa və Azərbaycanın tələbatlarını tam ödəməyə kifayətdir. Məhz bu məqsədlə analoq televiziyadan rəqəmsal televiziyaya keçiddə boşalan tezliklərdən rasional istifadə imkanlarını müəyyən edəcək xüsusi kriteriyaların aydınlaşması tələb olunur.
RRB-nin komissiyaları tərəfindən müzakirə edilən məsələlərdən biri də bu və ya digər tezliklərin müəyyən rabitə və teleradioyayım standartları altında istifadəsi məqsədilə ümumi kriteriyaların müəyyən edilməsidir. Bu, sərhədyanı zonalarda onların koordinasiya məsələlərini sadələşdirmək üçündür.
