Azərbaycan, Bakı, 13 sentyabr /Trend, müxbir H.Vəliyev/
Azərbaycan üçüncü nəsil simsiz rabitə (3G) üçün nəzərdə tutulan 790 и 860 MHz tezlik resurslarının UMTS (Universal Mobile Telecommunications System) standartına ayırılması üzrə təklifləri dəstəkləyir. Bu barədə bazar ertəsi Trend-ə Azərbaycan Rabitə və İnformasiya Texnologiyaları Nazirliyinin Dövlət Radiotezliklər İdarəsindən (DRİ) bildiriblər.
Məsələyə sentyabrın 7-dən 9-dək Bakıda keçirilmiş Regional Rabitə Birliyinin (RRB) radiotezlik spektrinin və radioelektron vasitələrinin elektromaqnit uyğunlaşmasının istifadəsinin nizamlanması məsələləri üzrə komissiyasının iclasında baxılıb.
Analoq televiziyadan rəqəmsal televiziyaya keçid zamanı boşalan 790 və 860 MHz diapazonlarının GSM operatorların ehtiyacı üçün səmərəli istifadəsi üzrə təkliflər hazırlanıb.
İndi Azərbaycanda bu tezliklər rəqəmsal televiziyanın ehtiyaclarına cəlb edilib. RRB-nin bəzi üzv ölkələrində onlardan mülki aviasiyada da istifadə olunur.
Bu tezlik resurslarının simsiz rabitə operatorlarının ehtiyaclarına ayrılması haqqında yekun sənəd baxılması üçün oktyabrın 4-dən 22-dək Meksikada keçiriləcək "ITU-2010" səlahiyyətli konfrans zamanı təqdim ediləcək. Bu məsələ ilə bağlı son qərarın 2012-ci ildə Beynəlxalq Telekommunikasiya İttifaqının Ümumdünya Radiorabitə Konfransı (ITU - International Telecommunication Union) çərçivəsində qəbul olunacağı gözlənilir.
