Azərbaycan, Bakı, 18 noyabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi yanında Dövlət Radiotezliklər İdarəsinin (DRİ) mühəndislərinə IMS ( İP Multimedia Subsystem) həlləri bazasında rabitə şəbəkələrinin qurulmasının əsasları öyrədilib. Bu barədə cümə axşamı Regional Rabitə Birliyindən (RRB) məlumat verilib.
Mütəxəssislər üçün bu sahədə sentyabrın 20-dən oktyabrın 16-na qədər Moskva Texniki Rabitə və İnformatika Universitetinin İxtisasartırma İnstitutu bazasında "IMS: texniki və iqtisadi tətbiq nöqteyi-nəzərləri" mövzusunda təlim kursu keçirilib.
Kurslarda Azərbaycan, Belarus, Qazaxıstan, Qırğızıstan və Rusiyadan 29 mütəxəssis iştirak edib.
DRİ əməkdaşları IMS bazasında müasir rabitə şəbəkələri, IMS texnologiyalarının tətbiqi üzrə texniki və iqtisadi xüsusiyyətlər və telekommunikasiya şirkətlərinin təcrübəsi, IMS texnologiyaların standartlaşdırılması üzrə mərhələlər və müasir vəziyyət, göstərilmiş bazada şəbəkə qurulması üçün istifadə olunan protokollar və interfeyslər sahəsində nəzəri biliklər qazanıblar. İştirakçılara kursu bitirmək üzrə Beynəlxalq Telekommunikasiya Birliyinin sertifikatı verilib.
IMS texnologiyası özündə standartlaşdırılmış, iqtisadi cəhətdən əlverişli, rabitə operatorlarına qısa müddət ərzində yeni telekommunikasiya xidmətlərini tətbiq etməyə imkan verən sistemi əks etdirir. IMS həlləri istənilən stansionar və mobil qurğudan ümumi xidmətə çıxış əldə etməyə imkan verir. O, eyni zamanda İP vasitəsilə səsli rabitə, məlumat ötürülməsi və s. kimi bir çox multimedia tətbiqlərini dəstəkləyir, yeni xidmət və şəbəkə konvergensiyası imkanları açır, həmçinin, İP şəbəkə mühitinə təbii təkamül mərhələsi hesab olunur.
