Azərbaycan, Bakı, 10 yanvar /Trend, müxbir H.Vəliyev/
Azərbaycanda radioelektron vasitələrindən (ratsiyalar və s.) və tezliklərdən istifadə, ödənişlərin aparılması güc meyarı ilə tənzimlənir. Bu barədə Azərbaycan Rabitə və İnformasiya Texnologiyaları Nazirliyi yanında Dövlət Radiotezliklər İdarəsindən məlumat verilib
2004-cü il aprelin 14-də Azərbaycan Nazirlər Kabinetinin qəbul etdiyi 54 saylı qətnaməyə əsasən, mülki dövriyyənin müəyyən iştirakçılarına mənsub ola bilən və dövriyyədə olmasına xüsusi icazə əsasında yol verilən (mülki dövriyyəsi məhdudlaşdırılmış) əşyaların güc meyarı həddi müəyyən edilib.
Radiotezliklər İdarəsinin məlumatına əsasən, 1 QHs-ə dək tezlik diapazonu üçün - gücü 0,3 Vt-dan yuxarı, yəni həmin diapazonda çıxış gücü 0,3 Vt-dan aşağı olan ratsiya və s. ödənişsiz istifadə olunur. 1 QHs-dən yüksək tezlik diapazonu üçün - gücü 0,03 Vt-dan yuxarı, yəni həmin diapazonda çıxış gücü 0,03 Vt-dan aşağı olan ratsiya və s. ödənişsiz istifadə olunur.
Avadanlığın istismarı barədə Rabitə və İnformasiya Texnologiyaları Nazirliyi ilə razılıq əldə etmək və DRİ-də qeydiyyatdan keçmək lazımdır.
Radioelektron vasitələrdən istifadə qaydalarını pozan şəxslərə qarşı Azərbaycan Respublikasının mövcud qanunvericiliyinə əsasən tədbir görüləcək.
