Azərbaycan, Bakı, 9 mart /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Aztelekom" İstehsalat Birliyinin şəbəkə infrastrukturunun 21 faizi NGN (NGN - Next Generation Network) şəbəkəsinə köçürülüb. Bu barədə Trend-ə çərşənbə günü "Aztelekom"un mətbuat xidmətinin rəhbəri Vidadi İsmayılov deyib.
NGN-in tətbiqi istehsalat birliyinin prioritet vəzifələrindən biridir. Operator onun köməyi ilə uzunmüddətli perspektivdə yeni xidmətlər seqmentinin artımının dəstəklənməsinə nail olmağa çalışır. Telefon şəbəkələrinin NGN texnologiyasına keçidi operatopa telefon şəbəkələrinin nömrə tutumunu artırmağa imkan verir. Yeni sistem operatora əhaliyə ənənəvi rabitə xidmətləri ilə yanaşı, IP-telefoniya, genişzolaqlı internet, IP-TV xidmətləri göstərməyə də imkan verir. Operator Göyçay və Salyan telefon şəbəkələrinin texniki təchizatı və gələcək nəsil (NGN-Next Generation Network) şəbəkəsinə keçirilməsi üzrə işlər aparır. Bu gün NGN operator şəbəkəsi Abşeron yarımadası, Sumqayıt, Şamaxı, Gəncə və Kürdəmir telekommunikasiya şəbəkələrini əhatə edir.
İsmayılovun sözlərinə görə, bu il "Aztelekom"un əsas vəzifəsi genişzolaqlı internetin inkişafıdır.
Hazırda operatorun şəbəkəsində genişzolaqlı qoşulmaların sayı 20 minə çatır. "Aztelekom"un proqnozlarına görə, 2011-ci ildə genişzolaqlı internetdən istifadə bazarında artım təxminən 40 faiz təşkil edəcək. Buna 2011-2013-cu illər üçün genişzolaqlı internetin inkişaf konsepsiyası xidmət edir. Konsepsiyada multimedia xidmətlərinin göstərilməsi üçün infrastrukturun inkişafı, eləcə də xidmətlərin kontentinin genişləndirilməsi (bank xidmətləri, elektron ticarət və s.) nəzərdə tutulub.
2010-cu ilin yekunları üzrə "Aztelekom"un infrastukturuna 46 milyon manat investisiya yatırılıb. Bunun 20 milyon manatı kredit kimi cəlb edilib. Bu il "Aztelekom"un telekommunikasiya infrastukturuna investisiyaların həcmi 50 milyon manat təşkil edəcək.