Azərbaycan, Bakı, 17 may /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi 2011-2013-cü illər üçün Azərbaycanda genişzolaqlı internetin inkişaf konsepsiyasının ilkin variantının hazırlanması üzrə işləri başa çatdırıb. Bu barədə çərşənbə axşamı Trend-ə nazirliyin informasiya cəmiyyətinin inkişafı şöbəsinin müdiri İsfəndiyar Əliyev deyib.
Əliyevin sözlərinə görə, konsepsiyanın ilkin variantına nazirliyin rəhbərliyi baxır. O bəyənildikdən sonra digər dövlət orqanlarına baxılmağa veriləcək. Bundan sonra konsepsiyanın son variantı formalaşdırılacaq.
"Strategiyanın ilkin variantında həm infrastrukturun, həm də bilavasitə internet-servis provayderlərinin regionlara çıxması üçün lazımi şəraitin yaradılması məqsədilə kompromis təkliflərin inkişaf məsələləri əks olunub. Strategiyada göstərilən mühüm aspektlərdən biri də simsiz Wi-Fi infrastukturunun həm paytaxtda, həm də regionlarda inkişafı və bu baza əsasında internet şəbəkəsindən pulsuz istifadə xdimətlərinin göstərilməsidir", - Əliyev bildirib.
Hazırda simsiz Wi-Fi-dan istifadə yalnız natamam inkişaf edib və ondan yalnız müəyyən yaşayış massivlərində və ictimai yerlərdə (mehmanxana, restoran, ali məktəblər, parkların ərazisində və s.) istifadə etmək mümkündür.
Əliyevin sözlərinə görə, genişzolaqlı internetin inkişaf konsepsiyası internet bazarının inkişafına yönəlib. Onun inkişafı tədricən azalacaq interet tariflərinə də təsir edəcək. Yeni konsepsiya perspektivdə internet şəbəkəsindən istifadənin qiymətini iki dəfə azaldacaq.
"Düşünürəm ki, 1 Mbit/saniyə sürətli genişzolaqlı internetə qoşulmanın qiymətinin 10 manat səviyyəsində olması optimal olar. İndi bu, son istifadəçiyə orta hesabla 20 manata başa gəlir", - Əliyev bildirib.
Yeni konsepsiya son istifadəçi üçün daha əlverişli olmasını təmin etmək məqsədilə genişzolaqlı internetdən istifadə imkanlarının genişləndirilməsini nəzərdə tutur.
Konsepsiya operatorların telekommunikasiya qovşaqlarında genişzolaqlı internet portlarının sayının artırılmasını, tariflərin azaldılmasını, təklif olunan tarif planlarının sayının artırılmasını, multimedia xidmətlərinin göstərilməsi üçün infrastrukturun inkişafını, kontent-xidmətlərin (bank xidmətləri, elektron ticarət və s.) genişləndirilməsini nəzərdə tutur.
Azərbaycanın Rabitə və İnformasiya Texnologiyaları Nazirliyinin statistikasına görə, 2010-cu ilin sonuna olan vəziyyətə görə, respublikada internetin yayılma səviyyəsi 12 faiz təşkil edib. Nazirliyin hesablamalarına görə, 2011-ci ildə genişzolaqlı çıxış bazarında artım təxminən 40 faiz təşkil edəcək.
