Azərbaycan, Bakı, 7 iyun /Trend, müxbir H.Vəliyev/
Azərbaycan Milli Elmlər Akademiyasının İnformasiya Texnologiyaları İnstitutu iyunda AzScienceNet elmi kompyuter şəbəkəsində qeydə alınan şəbəkə insidentləri və virus aktivliyinin miqdarı haqqında ilk statistik hesabatı dərc edəcək. Bu barədə çərşənbə axşamı Trend-ə institutun struktur bölməsinin rəhbəri Yadigar İmamverdiyev məlumat verib.
İmamverdiyevin sözlərinə görə, statistik hesabat şəbəkə hücumları və onların təhlükəlilik səviyyələri haqqında məlumatlar daxil olmaqla, şəbəkə insidentlərinə və zəifliklərinin təsvirinə həsr olunacaq.
"Statistik hesabat funksiyaları bilavasitə AzScienceNet şəbəkəsini əhatə edən AZ-CERT kompyuter insidentlərinə reaksiya komandası tərəfindən hazırlanacaq. Hesabat hər ay dərc olunacaq", - İmamverdiyev bildirib.
Hesabatın hazırlanmasında əsas məqsəd təhdidlər bardədə istifadəçiləri vaxtında xəbərdar etməkdir ki, bu da virus və haker hücumlarından dəyən ziyanı əhəmiyyətli dərəcədə azaltmağa imkan verəcək.
