...

EPEG layihəsinin Azərbaycan hissəsi ilin sonunda test rejimində işə salınacaq

Telekommunikasiya Materials 28 Noyabr 2011 13:55 (UTC +04:00)

Azərbaycan, Bakı, 28 noyabr /Trend, müxbir H.Vəliyev /

İlin sonunadək Europe Persia Express Gateway (EPEG) kabel magistralı layihəsinin Azərbaycan hissəsi test rejimində işə salınacaq. Bu barədə bazar ertəsi Trend-ə Delta Telecom şirkətinin texniki direktoru Rahid Ələkbərli bildirib.

Onun sözlərinə görə, layihə iştirakçıları Bakıdakı son görüş çərçivəsində 2011-ci ilin sonunadək layihə üzrə texniki işlərin başa çatdırılması barədə qərar qəbul ediblər. Bu işlər çərçivəsində beynəlxalq birləşmələrin infrastrukturunun yaradılması, şəbəkələrin birləşdirilməsi və həcmlərin tranziti nəzərdə tutulur.

"Hazırda müzakirələr tamamlanma mərhələsindədir və işin texniki şərtləri əsasında qurulma işlərinə artıq başlanılıb. Biz zəruri texniki avadanlıqları artıq sifariş etmişik və onlardan EPEG-in Azərbaycan hissəsində istifadə olunacaq. O, ölkəyə təxminən yaxın iki həftə ərzində daxil olacaq, bundan sonra qurulma işlərinə və şəbəkə infrastrukturunun test rejiminə keçirilməsinə başlanacaq", - Ələkbərli deyib.

İlkin hesablamalara görə, Azərbaycan seqmentinin tikintisinin dəyəri təxminən 3 milyon dollar təşkil edəcək.

EPEG kabel magistralının yaradılması üzrə konsorsiuma İranın TIC (Telecommunication Infrastructure Company), Omanın "Omantel", Rusiyanın "Rostelekom" şirkətləri və C&W beynəlxalq şirkəti (Cable&Wireless) daxildir.

EPEG kabel marşrutu başlanğıcını Omandan götürür və Frankfurtadək çəkiləcək. Gözlənildiyinə görə, kabel operatorları EPEG-in yaradılmasında iştirak etməyən 3 ölkənin ərazisindən də keçməlidir. Söhbət Azərbaycan, Polşa və Ukraynadan gedir.
Bu marşrutlar 3 dövlətdən hər birində icarəyə götürülən qurğularda təşkil ediləcək.

Delta Telecom infrastrukturu həm beynəlxalq internet-kanalların trafiki həcmlərinin tranziti, həm də səs xidmətləri və məlumatların ötürülməsi kimi xidmətlərlə təmin etməyə qadirdir.

Avropanı Ukrayna ilə Rusiya sərhədinədək birləşdirən kabelin çəkilməsi ilə C&W şirkəti, magistral xəttin Rusiya-Ukrayna sərhədindən Azərbaycanadək və Azərbaycandan İranadək tikilməsi ilə "Rostelekom" məşğul olacaq. İrandan Fars körfəzinədək olan xəttə görə TIC şirkəti, xəttin Omanadək çatdırılmasına görə "Omantel" məsul olacaq.

EPEG kabel magistralının buraxılış qabiliyyəti 3,2 Tbit/s təşkil edəcək. Onun uzunluğu isə 6 min kilometrə çatacaq. Layihənin ilkin dəyəri təxminən 200 milyon dollar məbləğində qiymətləndirilir. Kabel magistralının 2012-ci ilin mayında işə salınması gözlənilir.

Xəbər lenti

Xəbər lenti