Azərbaycan, Bakı, 28 yanvar /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi Azərbaycanda regional DATA-mərkəzin yaradılmasında "Microsoft" Korporasiyasına kömək etməyə hazırdır. Bu barədə şənbə günü Trend-ə nazirlikdən məlumat veriblər.
Məlumata əsasən, layihə bilavasitə "Microsoft"un öz resursları hesabına həyata keçiriləcək. Kompleks bulud servislərin inkişafına yönəldiləcək.
Hazırda mərkəzin tikinti planlarının müzakirəsi aparılır. Bu da Azərbaycanın dövlət qurumlarına lisenziyalaşdırılmış proqram təminatının çatdırılması layihəsinin müzakirəsi zamanı toxunulan mövzulardan biridir.
"Microsoft" korporasiyası tərəfindən DATA-mərkəzlərin tikintisi üzrə dünya xəritəsi tərtib edilib. DATA-mərkəzin tikintisi altında yerin seçilməsi zamanı əsas prinsip enerji təchizatı və enerji xərclərinin sabitliyidir.
Dünya təcrübəsində "Microsoft"un DATA-mərkəzlərində "Microsoft Dynamics CRM", "Sharepoint" və "Office Live"in "SaaS" variantları, "Microsoft Bing" axtarış sistemi və s. yerləşir.
Mərkəzin hesablama imkanlarının icarəsi dəfələrlə qənaət etməyə imkan verir. Hesablama buludlarının əsas üstünlüyü isə infrastrukturun çevik idarə edilməsi və avadanlığın əldə edilməsi, onun işə salınması və işlə təminatına çəkilən birdəfəlik kapital xərclərin azaldılmasıdır.
