Azərbaycan, Bakı, 17 fevral /Trend, müxbir H.Vəliyev/
Azərbaycanda nömrələrin daşınması (MNP - Mobile Number Portability) xidmətindən abunəçilərin az bir hissəsi istifadə edəcək. Trend-in məlumatına görə, bu barədə cümə günü jurnalistlərə "Azercell Telekom" şirkətinin rəhbəri Əli Ağan bildirib.
Ağanın sözlərinə görə, dünya təcrübəsində bu xidmətin istifadəçilərinin sayı abunəçilərin ümumi sayında 10 faizə çatır. Azərbaycanda bu göstərici təxminən 3-4 faiz təşkil edəcək.
"Nömrələrin daşınması xidmətinin işə salınması ən azından "Azercell" üçün yeni abunəçilərin sayının artmasına xidmət edəcək. Bu xidmətin istifadəçilərinin müəyyən kateqoriyası müxtəlif şəbəkələrə miqrasiya edəcək və nəticədə operator tərəfindən göstərilən xidmətin keyfiyyətinə uyğun seçim ediləcək", - Ağan qeyd edib.
"Azercell Telekom" şirkəti rəhbərinin sözlərinə görə, MNP sistemi olduqca mürəkkəbdir, buna baxmayaraq, operatorlar artıq onun tətbiqinə hazırdırlar.
Onun tətbiq edilməsi məsələsi dəfələrlə bu sistemin qurulması ilə məşğul olan inteqrator şirkətlə müzakirə edilib. "Azercell" mütəxəssisləri də bu xidmətin artıq işə salındığı Gürcüstanda olublar.
"Güman edirəm ki, MNP xidmətinin tətbiqi üzrə bütün texniki məsələlər bu ilin dördüncü rübündən gec olmayaraq həll ediləcək", - Ağan vurğulayıb.