Azərbaycan, Bakı, 4 mart /Trend, müxbir H.Vəliyev/
İlin sonuna kimi Naxçıvan Muxtar Respublikasında (NMR) "Elektron hökumət"ə tam keçid gözlənilir. Bu barədə Trend-ə bazar ertəsi NMR-in Rabitə və Texnologiyaları Nazirliyindən bildiriblər.
Məlumata görə, hazırda NMR-də 76 dövlət orqanının internet resursu var. Elektron xidmətin tədbiq edilməsi üçün nazirlik tərəfindən 34 dövlət orqanına reyestr nömrələri verilib və onlara xidmət reqlamentinin hazırlanmasında lazımi kömək göstərilir.
NMR-də fəaliyyət göstərən telekommunikasiya şəbəkələrinin 87,3 faizi optik-lif xətlərinə qoşulub. Hazırda "evə optika" prinsipi üzrə qoşulmaların sayının genişlənməsi üzrə işlər aparılır.
Əlaqənin alternativliyini təmin etmək üçün Naxçıvan-Türkiyə-Gürcüstan-Bakı marşrutu ilə optik magistralın üzərindən qoşulmalar yaradılıb. Naxçıvan-İran-Bakı marşrutu üzrə isə yeni qoşulmalar yaradılıb.
Hazırda NMR-in yaşayış məntəqələrinin 80 faizi internet şəbəkəsinə simsiz çıxışla təmin olunub. Muxtar Respublikada stasionar genişzolaqlı internetə çıxış isə 58 faziə çatıb. NMR-də orta məktəblərdə kompüterlərin 83 faizi internet şəbəkəsinə qoşulub.
Hazırda Muxtar Respublikada hər 100 ailəyə 66 stasionar telefon düşür.
