Azərbaycan, Bakı, 20 may /Trend, müxbir H.Vəliyev/
"Azərpoçt" MMC beynəlxalq poçt göndərişlərinin gömrük nəzarətinə təqdim edilməsi ilə əlaqədar beynəlxalq göndərişlərin əlavə xidmətləri üzrə tariflərə dəyişiklik edib. Bu barədə Trend-ə Rabitə və İnformasiya Texnologiyaları Nazirliyinin Poçt sektorunun müdiri Novruz Məmmədov deyib.
Məmmədovun sözlərinə görə, dəyişikliklərlə əlaqədar olaraq, ölkədən çıxarılan kiçik paketlərin (zərflərin) gömrük nəzarətinə təqdim edilməsinin qiyməti 0,8 manat (daha əvvəl 0,6 manat), bağlamanın qiyməti isə 1 manat (0,8 manat) təşkil edəcək.
Daxil olan beynəlxalq göndərişlərin gömrük nəzarətinə təqdim edilməsi üzrə tariflərə də dəyişikliklər edilib. Yeni tariflərə əsasən, kiçik paketlərin gömrük nəzarətinə verilməsi 1,4 manata (0,8 manat), bağlamaların təqdim edilməsi isə 2 manata (1,2 manat) başa gələcək.
Məmmədov qeyd edib: "Xatırlatmaq istərdik ki, daha əvvəl qüvvədə olan tariflər poçt operatoru tərəfindən 2008-ci ildə müəyyənləşdirilib. Mayın 16-dan qüvvəyə minən yeni tariflərin tətbiqi poçt operatorunun xərcləri ilə bağlıdır. Belə ki, bu xərclər daxil olan kiçik paket və bağlamaların həcminin əhəmiyyətli dərəcədə artması hesabına xeyli çoxalıb. Bu amil prosedur qaydalarına əsasən, "Azərpoçt"un poçt göndərişlərinin işlənməsi ilə və onların ünvana çatdırılması ilə məşğul olan işçilər ştatının artmasına səbəb olub".
Məmmədovun szölərinə görə, poçt operatoru tərəfindən tariflərin tənzimlənməsi "Poçt rabitəsi haqqında" qanunun 9.4-cü maddəsinə əsasən həyata keçirilir. Poçt operatorunun tarifləri üzrə ətraflı məlumatı www.azerpost.az səhifəsindən əldə etmək olar.