Azərbaycan, Bakı, 10 sentyabr /Trend, müxbir Hüseyn Vəliyev/
Azərbaycanda informasiya təhlükəsizliyini operativ idarəetmə mərkəzinin (SOC - Security Operations Center) yaradılması planlaşdırılır. Bunu Trend-ə ölkənin telekommunikasiya bazarındakı mənbə deyib.
Mənbənin sözlərinə görə, SOC informasiya təhlükəsizliyinə real vaxt rejimində nəzarət və idarə etməyə imkan verəcək, habelə informasiya təhlükəsizliyinin təmin edilməsi üzrə tələb olunan səviyyəyə çatmaqda və dəstəkləməkdə əminlik yaradacaq.
Agentliyin həmsöhbəti qeyd edib ki, layihənin reallaşdırılmasına başlanması maliyyə vəsaitləri alındıqdan sonra gözlənilir: "Layihəyə qlobal informasiya təhlükəsizliyi bazarı iştirakçılarının cəlb olunacağı nəzərdə tutulur".
Hazırda müəssisələrin informasiya təhlükəsizliyinin səviyyəsinin qiymətləndirilməsi Rabitə və Yüksək Texnologiyalar Nazirliyinin Elektron Təhlükəsizlik Mərkəzi tərəfindən aparılır. Təhlilin nəticələri yuxarıdakı instansiyaya göndərilir.
Mənbənin sözlərinə görə, vəziyyətin təhlili göstərir ki, ayrı-ayrı strukturların informasiya təhlükəsizliyi çox ağır vəziyyətdədir: "Bu da çox vaxt informasiya təhlükəsizliyinin problemləri və riskləri haqqında kifayət qədər məlumatlı olmamaqla bağlıdır".
