2006-cı ildə Catel (Caspian American Telecommunications, LLC) Azərbaycan-Amerika müştərək müəssisəsi (MM) 45 min nömrə istismara verməyi planlaşdırır. MM-də Trend ə bildirilib ki, hazırda simsiz stasionar rabitə də daxil olmaqla Catel abunəçilərinin sayı 19729 təşkil edir. 2005-ci ildə 6603 nömrə istismara verilib.
Eyni zamanda müəssisə CDMA (Code Division Multiple Access) simsiz rabitəni genişləndirmək məqsədilə ölkənin regionlarında 2006-cı ilin yanvarın 18-də Şəmkirdə yeni stansiyanı istismara verib. Analoji stansiyalar Gəncə, Nabran və Xudat kimi regionlarda da mövcuddur.
Bu işlərlə paralel olaraq Naxçıvan Muxtar Respublikasında şəbəkənin yaradılması üçün tədbirlər həyata keçirilir və Lənkəranda simsiz rabitə xətti çəkilir. Bu istiqamətdə Bakı-Gəncə (Hacıqabul, Kürdəmir, Yevlax, Goranboy) və Gəncə-Ağstafa (Şəmkir, Tovuz, Qazax, Gədəbəy) kimi regionlarda işlər həyata keçiriləcək. Eyni zamanda Xaçmaz, Quba və Qusar kimi rayonlarda da stansiyalar quraşdırılacaq.
MM 1997-ci ildə rabitoə və informasiya texnologiyaları nazirliyi və OMSL (Omni-Metromedia-Caspian Ltd.) tərəfindən yaradılıb, həmçinin Azərbaycanda rabitə bazarında simsiz telefon rabitəsi üzrə lisenziya almış ilk operatordur.
