Azərbaycanın "Caspel" şirkəti "3Com"un illik tərəfdaşlıq forumunda iştirak edəcək
Azərbaycanın "Caspel" şirkəti "3Com" korporasiyasının illik tərəfdaşlıq forumunda iştirak edəcək. Şirkətdən "Trendə" verilən xəbərə görə, sentyabrın 14-də Moskvada keçiriləcək tədbirdə "Caspel"in baş direktoru Mübariz Piriyev və şirkətin layihə şöbəsinin rəhbəri Fərhad İbrahimov iştirak edəcəklər. Foruma həmçinin 7 şirkət dəvət olunub.
Tədbirdə 2006-cı maliyyə ilində şirkətin gördüyü işlərin nəticələri təqdim olunacaq, "3Com"un strateji istiqamətləri və inkişaf perspektivləri qeyd olunacaq, Fokus tərəfdaşlıq proqramının inkişaf yekunları müzakirə olunacaq və sertifikatlar təqdim olunacaq. Forumun proqramına birinci rübün yekunlarına əsasən yüksək göstəricilər əldə etdiyinə görə rüblük "3Com Formulu" mükafatının verilməsi də daxildir.
Forumda vitse-prezident, EMEA (Avropa, Yaxın Şərq və Afrika) üzrə baş direktor Kurt Fişer (Curt Fisher), vitse-prezident, MDB, Şərqi Avropa, Yaxın Şərq, Afrika üzrə baş direktor Qaetan Kantale (Gaetan Cantale), "3Com" korporasiyasının marketinq üzrə direktoru Devid Alen (David Allen), EMEA üzrə maliyyə direktoru Pol Kross (Paul Cross), eləcə də "3Com"un MDB-dəki nümayəndəliklərinin əməkdaşları iştirak edəcəklər.
Qeyd edək ki, bu ilin iyununda "3Com" tərəflər arasında imzalanmış müqavilə əsasında "Caspel"i korporasiyanın Azərbaycan ərazisindəki nümayəndəsi elan edib. "Caspel" 7 ildən artıqdır ki, sistem inteqrasiyası və konsaltinq xidmətləri lokal bazarında fəaliyyət göstərir və "3Com" məhsullarının layihələrdə tətbiqi üzrə böyük təcrübəyə malikdir. "Caspel" sistem inteqratoru statusunu saxlamaqla, nümayəndəlik funksiyanı yerinə yetirir və Azərbaycanda "3Com"un korporativ satışını inkişaf etdirir.
