Cisco Systems korporasiyası Azərbaycanda əməkdaşlıq və biznesin genişləndirilməsində maraqlıdır. Şirkət Azərbaycanda yüksək texnologiyaların inkişafı üzrə xüsusi iqtisadi zonaların (XİZ) yaradılması layihəsində iştirak etmək fikrindədir. Trend Cisco Systems şirkətinin inkişaf etməkdə olan bazarlarda iş üzrə prezidenti Pol Montforda istinadən xəbər verir ki, şirkətin nümayəndə heyətinin BakuTel 2006 beynəlxalq telekommunikasiya sərgisində iştirak etmək üçün Bakıya səfəri zamanı konkret layihələrin reallaşdırılması müzakirə edilib.
Korporasiya XİZ çərçivəsində yaradılması nəzərdə tutulan regional innovasiya mərkəzinin çərçivəsində mühəndislərin regional tədris mərkəzinin yaradılması təşəbbüsü ilə çıxış edib.
Şirkətin digər təklifi Azərbaycanda növbəti nəsil texnologiyalarının (Next Generation Network) tətbiqi üzrə layihədir.
Mütəxəssisin sözlərinə görə, Cisco "Elektron hökümət" üzrə layihələrin tətbiq olunması sahəsində Azərbaycana məsləhətlər verməyə hazırdır.
Hazırda Azərbaycanın Rabitə və İnformasiya Texnologiyaları Nazirliyi və Cisco Systems arasında "Əməkdaşlıq haqqında" memorandum hazırlanır.
Cisco-nun Azərbaycandakı biznesi uğurla inkişaf edir. 2000-ci ildən respublikada Cisco-nun 9 şəbəkə akademiyası açılıb və burada ən yeni telekommunikasiya texnologiyaları üzrə mütəxəssis olmaq istəyən yüzlərlə insan təhsil alır. Yaxın vaxtlarda repsublikada belə akademiyaların sayı artacaq.
