Azərbaycan, Bakı/müxbir Trend S.Babayeva/"Xalq kompüteri" layihəsinin ilkin variantının xüsusi işçi qrupu tərəfindən müzakirəsi mayın 25-dən iyunun 5-nə təxirə salınıb. Bu barədə şənbə günü Azərbaycanın Rabitə və İnformasiya Texnologiyaları Nazirliyindən məlumat verilib.
İşçi qrup bir sıra nazirliklər, "İntel" və "Misrosoft"un mütəxəssislərindən ibarətdir. Görüşün vaxtının təxirə salınmasının səbəbi işçi qrup üzvlərinin gərgin iş qrafikidir.
Bu görüş işçi qrupun bu layihə ilə bağlı ikinci görüşü olacaq. Əvvəlki görüşdə layihənin hökumətə təqdim olunmasından öncə layihəyə bəzi dəyişiklik və əlavələrin edilməsi məqsədəuyğun hesab olunub.
"Xalq kompüteri" layihəsinin mahiyyəti əhalinin az təminatlı təbəqəsinə aşağı faiz qoyuluşları ilə uzun müddətli kreditlə kompüterlərin təqdim olunmasından ibarətdir.
Maliyyələşmənin həm hökumət, həmçinin xarici borcalmalar hesabına həyata keçirilməsi variantları nəzərdən keçirilir.
"Microsoft" lisenziyalaşdırılmış proqram təminatı, "İntel" isə güzəştli əsaslarla müvafiq avadanlıqları təqdim edəcək.
Rabitə Nazirliyinin təxmini hesablamalarına görə, bu gün Azərbaycanda hər 100 nəfərə 3-4 kompüter düşür. Yeni layihənin reallaşdırılacağı təqdirdə bu göstərici beş dəfə arta bilər.