İran Parlamentinin spikeri və ölkənin nüfuzlu siyasətçisi Əli Laricani Barak Obamanı ABŞ prezidentliyinə daha layiqli namizəd adlandırıb. "Demokratlardan olan namizəd Barak Obama respublikaçı Con Makeyndən daha müdrük namizəd kimi görünür", - deyə jurnalistlərə Bəhreyndə işgüzar səfərdə olan Laricani bildirib. "Lakin real sınaq iş olacaq, söz deyil", - RBK -nın Associated Press-ə istinadən verdiyi məlumata görə İran siyasətçisi bildirib.
Jurnalistlərin, İran rəhbərliyinin fikrincə ABŞ-ın İslam Respublikasına müdaxiləsinin nə dərəcədə ehtimal olunmasına dair suallarına cavab verən Laricani bildirib: "ABŞ-da iqtisadi böhranın miqyası o dərəcədə genişdir ki, daha bir hərbi kampaniya bu xəstəliklərin sağalmasına heç cür yardım etməyəcək".
İran Parlamentinin spikeri Laricani 2007-ci ilədək İran Təhlükəsizlik Şurasının katibi vəzifəsini tutub və Tehranın nüvə proqramı üzrə baş elçi vəzifəsini icra edib.