Azərbaycan, Bakı, 25 avqust / Trend , müxbir Ü.Sadıxova /
Ağ Ev Administrasiyası və Avropa İttifaqı (Aİ) 2011-ci ildə elan olunacağı təqdirdə müstəqil Fələstin dövlətini tanıyacaqlar. Bu barədə Fələstin Administrasiyasının Qahirədəki rəsmi nümayəndəsi Nabil Şaat bildirib.
"ABŞ və Avropa iki il ərzində İsrail ilə danışıqların nəticə verməyəcəyi təqdirdə, müstəqil Fələstin dövlətini tanıyacaqlar", - Trend -a telefonla Qahirədən İsrail ilə danışıqlarda fələstinlilərin keçmiş başçısı Şaat bildirib.
"Fələstin rəhbərliyi Aİ-nin xarici siyasət üzrə ali komissarı Havyer Solananın iki il ərzində İsrail ilə danışıqların nəticə verməyəcəyi təqdirdə Qərb Sahilində müstəqil dövlətin yaradılması haqqında bəyanatını nəzərə alaraq, 2011-ci ildə müstəqil Fələstin dövlətini elan etmək niyyətindədir", - Şaat bildirib.
Çərşənbə axşamı Fələstin Administrasiyasının Baş naziri Səlim Fəyyad Londonun "The Times" qəzetinə müsahibəsində bəyan edib ki, fələstinlilər İsrail ilə sülh müqaviləsi imzalanmasa belə 2011-ci ildə müstəqil dövlət elan etmək niyyətindədirlər. Fəyyad əlavə edib ki, fələstinlilər İsrail işğalına özləri son qoymaq niyyətindədirlər.
Bir müddət əvvəl İsrailin Baş naziri Benyamin Netanyahu Qərb Sahili rəhbərliyinin İsraili yəhudi dövləti kimi qəbul edəcəyi təqdirdə, fələstinlilərin dövlət hüququnu tanıyacağını bildirmişdi.
Fələstin Muxtariyyətinin keçmiş informasiya naziri Şaat bildirib ki, Baş nazir Fəyyadın bəyanatı ABŞ Prezidenti Barak Obama tərəfindən bu yaxınlarda təklif olunacaq Yaxın Şərqdə barışıq planına dair optimizmə əsaslanır. "ABŞ Prezidentinin yeni planı iki il ərzində müstəqil Fələstin dövlətinin yaradılmasını nəzərdə tutur, Avropa İttifaqı da bu mövqeni dəstəkləyir", - Şaat bildirib.
Şaat hesab edir ki, gələcək Fələstin dövlətinin tanınması amili əsasən ABŞ-dan asılıdır. ABŞ neçə aydır ki, İsraildən Qərb Sahilində yəhudi qəsəbələrinin inşasını dayandırmağı və Fələstin dövlətinin yaradılması məqsədi ilə danışıqları davam etdirməyi tələb edir.
"İsrail üçün Fələstinin müstəqilliyini tanımaqdan başqa bir yol qalmır, çünki ABŞ və Aİ də bunu istəyir. İki il ərzində qəsəbələrin inşası və işğal dayandırılmasa biz də İsrail ilə razılığa gəlməyəcəyik, o zaman şübhəsiz ki, beynəlxalq cəmiyyət müstəqil Fələstin dövlətini tanımalıdır", - Şaat bildirib.
İsrailin Baş naziri Netanyahunun senyabrda fələstinlilərlə danışıqların bərpası barədə bəyanatına gəldikdə isə Şaat bildirib ki, Qərb Sahili rəhbərliyi İsrailin mövqeyini ciddi hesab etmir, çünki Netanyahu hökuməti ABŞ və fələstinlilərin əsas tələblərini yerinə yetirməyib.
"Netanyahu Obamanın tələb etdiyi iki əsas maddəni - yəhudi qəsəbələrinin inşasının dayandırılması və fələstinlilərin dövlət hüququnun tanınmasını yerinə yetirərsə, o zaman danışıqlara başlamaq ehtimalı mövcud olacaq", - Şaat bildirib.
Londonda çərşənbə günü ABŞ-ın Yaxın Şərqdə xüsusi səfiri Corc Mitçel və İsrailin Baş naziri Netanyahu arasında görüş keçiriləcək. Regiona səfəri zamanı Mitçelin ABŞ-ın Fələstin-İsrail danışıqlarında sonrakı addımları haqqında danışması gözlənilir.
Məqalə müəllifi ilə əlaqə ünvanı: [email protected]
