Qazaxıstan, Astana, 8 sentyabr /Trend, müxbir S.Süleymanov/
ABŞ hökuməti Qazaxıstan polisinə narkotiklərin qeyri-qanuni dövriyyəsi ilə mübarizə üçün 425 min dollar həcmində yardım göstərəcək. Bu barədə Trend-ə ABŞ Səfirliyinin mətbuat xidmətindən məlumat verilib.
"ABŞ hökuməti narkotiklərin qeyri-qanuni dövriyyəsi ilə mübarizə, narkotikə tələbatı azaltmaq, insan alveri ilə mübarizə və sərhəd təhlükəsizliyinin gücləndirilməsi sahəsində gələcək əməkdaşlıq üçün 425 min dollar məbləğində yardım ayırıb", - bu barədə ABŞ Səfirliyinin press-relizində deyilir.
Mövcud məbləğ iki ölkə arasında narkotiklərə nəzarət sahəsində qarşılıqlı anlaşma haqqında Memorandum protokolu çərçivəsində ayrılacaq. "Bu protokol çərşənbə axşamı Astanada daxili işlər naziri Serik Baymaqanbetov və ABŞ-ın fövqəladə və səlahiyyətli səfiri Riçard Houqland tərəfindən imzalanıb", - məlumatda deyilir.
