Azərbaycan, Bakı, 24 dekabr /Trend/
ABŞ-ın sabiq prezidenti Corc Buş (ata) tənəffüsü ilə bağlı problem hiss etdikdən sonra Hyustondakı xəstəxanalardan birinə yerləşdirilib. Bu barədə onun nümayəndələri məlumat veriblər. Trend xəbər verir ki, məlumatı "İnterfaks" BBC News-a istinadən yayıb.
Sabiq prezidentin xəstəxanaya ehtiyat tədbiri kimi yerləşdirildiyi bildirilir. 90 yaşlı Buş xəstəxanada müayinədən keçəcək. Başqa təfərrüatlar barədə hələlik məlumat verilmir.
Corc Buş-ata 1989-1993-cü illərdə ABŞ-ın 41-ci prezidenti, Ronald Reyqanın dövründə isə vitse-prezident (1981-1989) və Mərkəzi Kəşfiyyat İdarəsinin direktoru (1976-1977) olub.