Bakı. Trend:
Cümə günü Pakistanın şimal-qərbindəki Hayber Paxtunxva əyalətində polis maşınının yaxınlığında baş verən partlayış nəticəsində azı 5 nəfər ölüb, 22 nəfər yaralanıb.
Trend-in məlumatına görə, bu barədə polis və hökumət nümayəndələri məlumat verib.
Rayon komissarının müavini Mənsur Ərşad “Sinxua” agentliyinə bildirib ki, partlayış polis maşını yuxarıda adı çəkilən əyalətin Dera-İsmayıl-Xan rayonunda insanların sıx olduğu bazardan keçərkən baş verib.
O, yaralılar arasında ən azı 7 polis əməkdaşının olduğunu bildirib. Hücum motosikletə quraşdırılmış əldəqayırma partlayıcı qurğu vasitəsilə həyata keçirilib.
Bütün zərərçəkənlər yaxınlıqdakı xəstəxanaya çatdırılıb, onlardan bir neçəsinin vəziyyəti ağırdır.