Bakı. Trend:
Monteneqroda əhalinin qocalma səviyyəsi yüksəlib, özünü serb adlandıran vətəndaşların nisbəti isə 4 faizdən çox artıb.
Trend xəbər verir ki, bu barədə Monteneqro Statistika İdarəsinin (Monstat) ötən ilin dekabrında keçirilən əhalinin siyahıyaalınması ilə bağlı yekun hesabatında bildirilir.
Hesabata görə, Monteneqroda 623 min 633 nəfər yaşayır və bu rəqəm 2011-ci ildəki siyahıyaalma ilə müqayisədə 0,6 faiz çoxdur. Əhalinin 41,12 faizi monteneqrolu (256 min 463 nəfər), 32,9 faizi isə serb (205 min 370 nəfər) olduğunu bildirib. 2011-ci ildəki əvvəlki siyahıyaalmada bu nisbət müvafiq olaraq 45 faiz və 28,7 faiz idi. Əhalinin 9,45 faizini bosniyalılar (58 min 956 nəfər), 4,97 faizini albanlar (30 min 978 nəfər), 2,06 faizini ruslar (12 min 824 nəfər), 1,63 faizini isə müsəlmanlar (10 min 162) təşkil edir. Onlardan 2,88 faizi etnik mənsubiyyətini bildirmək istəməyib. Ukrayna münaqişəsinin səbəb olduğu miqrasiyanın artması fonunda ruslar ölkədə beşinci ən böyük etnik qrupa çevrilib.
Əhalinin 36,2 faizi Monteneqro dilində, 43,5 faizi isə serb dilində danışdıqlarını bildirib. Din baxımından 71,1 faiz pravoslav xristian, 20 faiz müsəlman, 3,2 faiz isə katolik xristian olduğunu bəyan edib.
Hesabatda qeyd olunur ki, ölkə üzrə orta yaş həddi 39,7 ildir, bu da 2011-ci illə müqayisədə iki il yarım çoxdur. Əhalinin 90,73 faizindən çoxu Monteneqro vətəndaşlığına malikdir.
Paytaxt Podqoritsa 179 mindən bir qədər çox əhalisi olan ölkənin ən böyük şəhərdir. Sonrakı yerlərdə Nikşiç, Biyelo Polye və Bar şəhərləri qərarlaşıb. Həmin dörd şəhərdə hazırda əhalinin 52,9 faizi yaşayır.