Bakı. Trend:
24 dekabrda, Muzey Mərkəzində «Muzeydə Musiqi Gecələri» layihəsi çərçivəsində, Azərbaycanın Xalq artisti, bəstəkar Cavanşir Quliyevin yaradıcılığına həsr olunmuş növbəti portret-konsert təşkil ediləcək. Bu konsert Bakı Müasir Musiqi Cəmiyyəti və Muzey Mərkəzinin birgə əməkdaşlığı ilə hazırlanıb.
Nuxa şəhərinin (hazırda Şəki şəhəri) doğma övladı olan Cavanşir Quliyev 1968-ci ildə Şəki Musiqi Məktəbinə daxil olmuşdur. Həmin ildə Azərbaycan Dövlət Konservatoriyasının (indiki Bakı Musiqi Akademiyası) Xalq Çalığı Alətləri Fakültəsinə qəbul olub. İki il sonra isə konservatoriyanın bəstəkarlıq fakültəsinə daxil olub və 1975-ci ildə bəstəkar, professor Cəfər Cavadovun rəhbərliyi altında həmin fakültəni bitirmişdir.
Tələbəlik illərindən etibarən Cavanşir Quliyev, musiqi kompozisiyalarının yaradılmasında eksperimental yanaşmalara maraq göstərmiş və bu yanaşmanı öz əsərlərində tətbiq etməyə başlamışdır. İkinci kursda yazdığı «Birinci kvartet» gənc bəstəkarın yeni yanaşmasının parlaq nümunəsi olub, burada o, milli musiqini müasir kompozisiya üsulları ilə sintez edərək yeni musiqi üslubu yaratmağa nail olmuşdur. Hətta bu eksperimental əsər böyük maraqla qarşılanmış, lakin uzun müddət Sovet İttifaqı Bəstəkarlar İttifaqının bir sıra konfranslarında «Milli və müasirlik» mövzusunda bədii mübahisələrə səbəb olmuşdur.
Hələ tələbəlik illərindən, 1973-cü ildən etibarən, Cavanşir Quliyev AzTV-də səsyazma rejissoru olaraq fəaliyyətə başlamış və orada 17 il çalışmışdır. 1990-1993-cü illərdə Azgoskontsertin bədii rəhbəri olmuşdur. 2003-cü ildə Azərbaycan Milli Konservatoriyasında dosent, 2005-ci ildə isə professor dərəcəsi almışdır. Həmin ildən etibarən o, Şimali Kiprdə yerləşən Yaxın Şərq Universitetinin «Səhnə Sənəti» fakültəsinin professoru olub. Cavanşir Quliyevin yazdığı mahnıları Brilliant Dadaşova, Zülfiyyə Xanbabayeva, Aygün Kəzımova kimi sənətçilər ifa etmişdir. Bir çoxları hitə çevrilmişdir:
«Hər şey gözəldir həyatda», «Hicran», «İtkin gəlin», «Qızım», «Sevəcəyəm», «Tənha qadın», «Məni daha gözləmə» və s. O, həmçinin, «Fəryad», «Şirbalanın məhəbbəti», «İtkin gəlin», «Süd dişinin ağrısı», «Aşıq Qərib» və bir çox digər tamaşalar, filmlər və teleseriallar üçün musiqi bəstələmişdir. Cavanşir Quliyev, saz alətini skripka, violonçel və fleyta ilə birlikdə istifadə etməyə başlayan ilk bəstəkar olub. 1980-ci ildə o, zurna və simfonik orkestr üçün «Uvertüra» əsərini yazıb və burada Azərbaycan musiqisinə özünəməxsus baxışını ifadə etmişdir. Ümumilikdə bəstəkarın «yığmasında» təxminən minə yaxın mahnı var, bunlardan 300-ü «MAHNILAR» adlı dörd cildlik toplusuna daxil edilmişdir.
Cavanşir Quliyev yalnız estrada kompozisiyaları ilə deyil, həm də ciddi janrdakı əsərləri ilə məşhurdur. Onun əsərləri SSRİ və sonra Azərbaycanı müxtəlif beynəlxalq musiqi simpoziumlarında və festivallarında, Polşadan ABŞ-a qədər, təmsil edib. Bunlara saz və skripka üçün sonata, fortepiano üçün yeddi əsər, İkinci kvartet, «Oğuznamə» baletinin Birinci Suiti daxildir ki, bunlar müxtəlif ölkələrdə - ABŞ, Finlandiya, Yuqoslaviya, Almaniya, Hollandiya, Türkiyədə ifa olunmuşdur. Hələ də böyük populyarlığa malik olan, 1992-ci ildə Xocalı faciəsindən dərhal sonra yazılmış «Əsgər marşı» vaxtilə hətta uşaq bağçalarında uşaqlar tərəfindən oxunurdu və bu gün ölkəmizin Milli Ordusunun paradlarında mütləq şəkildə ifa olunur.
2000-ci ildə Cavanşir Quliyev «Qızıl Derviş» teatr mükafatını almış, 2002-ci ildə isə Humay mükafatına layiq görülmüşdür. 2015-ci ildə «Qızıl Pəri» kino mükafatını və Azərbaycan Kinematoqrafçılar İttifaqının «Milli Kinematoqrafiyaya xidmətlərinə görə» mükafatını almışdır. Portret-konsertin proqramında bəstəkarın aşağıdakı əsərləri təqdim olunacaq: Saz və violin üçün sonata, İkinci simfonik kvartet və fortepiano üçün «Yeddi əsər».
Solistlər: Humay Qasımzadə (fortepiano), Samir Asadov (skripka), Aslan Müradoğlu (saz) və «Əkinçi» Kvarteti.
Gecənin moderatoru - bəstəkar Firudin Allahverdi.