Bakı. Trend:
Dövlət səviyyəsində hər zaman mədəniyyətimizin inkişafı milli mədəniyyət siyasətinin qayəsində dayanır.
Trend xəbər verir ki, bunu mədəniyyət nazirinin müavini Fərid Cəfərov bu gün bp-nin şair Məhəmməd Füzulinin 530 illik yubileyinə töhfəsi olan iki cildlik kitab təqdimatı zamanı deyib.
O bildirib ki, bu siyasətin əsasını mədəniyyətimizin yalnız mühafizəsi və müdafiəsi deyil, gənc nəslə zəngin irsimizin aşılanması, mədəniyyətimizin ölkə daxilində və ölkə xaricində təbliği təşkil edir:
"Düşünürəm ki, özəl sektorla birlikdə həyata keçirilən bu cür layihələr xüsusi əhəmiyyət kəsb edir.
Ötən il keçirilən Bakı Beynəlxalq Kitab sərgisinin Füzuli
yaradıcılığına, irsinə həsr olunması, eyni zamanda xaricdə
keçirilən bir çox mədəniyyət günləri, Özbəkistan, Qətər, Qazaxıstan
və Türkiyədə bu yaradıcılığın geniş şəkildə təqdimatının
keçirilməsi Azərbaycan mədəniyyətinin beynəlxalq arenalarda təbliği
baxımından xüsusi əhəmiyyət kəsb etmişdir".
"Bu da bir daha onu göstərir ki, dövlət tərəfindən daim
mədəniyyətimizə və ədəbiyyatımıza xüsusi yanaşma var.
Mədəniyyətimizin təməlində heç şübhəsiz ki, ədəbiyyatımız durur.
Ədəbiyyatımız mədəniyyətin bütün sahələrinin inkişafında həm yazılı
mənbə, həm də ona təkan verən bir qüvvə kimi çıxış edir", - deyə F.
Cəfərov vurğulayıb.