Bakı. Trend:
Xaçmaz Rayon İcra Hakimiyyətinin başçısı Elnur Rzayev növbəti səyyar qəbulunu keçirib. Yerli hüquq mühafizə orqanlarının rəhbərləri və xidmət təşkilatlarının məsul şəxslərinin iştirak etdiyi qəbul Əhmədoba kəndində reallaşıb.
Qəbulda Əhmədoba İnzibati Ərazi Dairəsi Üzrə nümayəndəliyinə
daxil olan Əhmədoba, Hacıəhmədoba, Hacıqazma və Qaracəlli
kəndlərinin sakinləri iştirak edib.
Görüş iştirakçıları əvvəlcə Əhmədoba kənd tam orta məktəbinin
həyətində şəhid İsmət Rəsulovun büstünü ziyarət edib.
Şəhidlərimizin əziz xatirəsini bir dəqiqəlik sükutla yad ediblər
.
Daha sonra fərdi qaydada müraciət və təkliflər dinlənilib. Sakinlər
kəndlərarası yolun təmiri, elektrik təsərrüfatının yenilənməsi,
əkin sahələrinin suvarılması üçün əlavə subartezian quyusunun
qazılması, yeni məktəb binasının inşası və digər sosial məsələlərlə
bağlı müraciətlər səsləndiriblər.
Rayon İcra Hakimiyyətinin başçısı Elnur Rzayev kənd sakinlərinin
arzu və təkliflərini həssaslıqla dinləyərək, onları narahat edən
problemlərin aradan qaldırılması istiqamətində müvafiq
tapşırıqlarını verib. Bir çox müraciətlər yerindəcə həll
edilib.
Sakinlər əhalinin problemlərinin həll edilməsi məqsədilə yerlərdə
həyata keçirilən tədbirlərə, göstərilən yüksək diqqət və qayğıya
görə Azərbaycan Respublikasının Prezidenti İlham Əliyevə
minnətdarlıqlarını ifadə ediblər.