Azərbaycan, Lənkəran, 28 aprel / Trend , müxbir P.Əliyeva/ Azərbaycanın cənubunda yerləşən Masallı rayonunun Güllütəpə kəndində baş verən sürüşmə zonasında evləri olan sakinlərə torpaq sahəsi ayrılacaq. Bu barədə bazar ertəsi Trend a Masallı rayon İcra Hakimiyyətindən məlumat verilib.
Güllütəpə ərazisində sürüşmə prosesi bir müddət əvvəl başlayıb. Ötən həftə isə sürüşmə prosesi aktivləşib.
Sürüşmə bir sutkada 15 sm qeydə alınır. Çatın dərinliyi isə 12 metrə çatır. Həmin ərazi sürüşmə ilə bərabər həm də çökür. Sürüşmə zolağının sahəsi 3,5 hektardır.
İcra Hakimiyyətindən bildiriblər ki, sürüşmə ərazisindən 4-5 kilometr aralıda olan boş ərazilərdən sakinlərə 6 sot torpaq sahəsinin ayrılması nəzərdə tutulub. Artıq bu barədə Nazirlər Kabinetinə müraciət olunub.
Sürüşmə zonasından 439 ailə köçürülməlidir. Indiyədək ərazidən 11 ailə köçürülüb və onlar müvəqqəti olaraq öz qohumlarının evlərinə yerləşdiriliblər.
Sürüşməyə isə kəndin yerləşdiyi yamacın yonulması, bitki və ağac örtüyünün məhv olması və torpağın elluval gilli olmasıdır.
Fövqəladə Hallar Nazirliyinin nümayəndəsi Arif Axundovun rəhbərliyi ilə ərazidə müşahidə-müayinə aparacaq mütəxəssis qrup yaradılıb.
Mütəxəssislərin qənaətinə görə, gələcəkdə sürüşmə ərazisindən 134 ev, 182 ailənin köçürülməsinə ehtiyac var.
Ümumi sahəsi 554 ha olan kənd Masallının 18 kilometrliyində yerləşir. Kəndin 2400 nəfər əhalisi var.
Məqalə müəllifi ilə əlaqə ünvanı: [email protected]