Azərbaycan, Bakı, 23 may /Trend, müxbir K.Zərbalıyeva/
Bakı-Qazax-Gürcüstan sərhədi magistral yolunda ağır yol qəzası baş verib.
Daxili İşlər Nazirliyinin Baş Dövlət Yol Polisi İdarəsindən bazar ertəsi Trend-ə verilən məlumata görə, mayın 23-də saat 00:35 radələrində Bakı-Qazax-Gürcüstan sərhədi yolunun Qaradağ rayonu ərazisindən keçən 51-ci km-də Kürdəmir rayon sakini Əliyev Telman Şəkər oğlu idarə etdiyi "Qaz-33021" markalı, 90-EA-743 dövlət qeydiyyat nişanlı avtomobillə Bakı şəhəri istiqamətində hərəkətdə olarkən eyni istiqamətdə hərəkət edən, Ağdaş rayon sakini Novruzov Rasim Əsgər oğlunun idarə etdiyi "Qaz-52" markalı, 45-BG-341 dövlət qeydiyyat nişanlı xüsusi təyinatlı avtomobili arxadan vurub.
Toqquşma nəticəsində "Qaz-33021" markalı avtomobildə olan sərnişinlər, Kürdəmir rayon sakinləri - 1981-ci il təvəllüdlü Hüseynov Xətai Tahir oğlu və 1985-ci il təvəllüdlü İslamov Ayaz Oqtay oğlu aldığı xəsarətdən hadisə yerində ölüb, hər iki avtomobilin sürücüləri isə xəsarət alaraq Bakı şəhəri Kliniki Tibbi Mərkəzə çatdırılıblar.
Faktla bağlı araşdırma aparılır.