Azərbaycan, Bakı, 20 aprel /Trend, müxbirlər K.Zərbalıyeva, İ.İsabalayeva/
Bakıda sərnişin avtobusu yük avtomobili ilə toqquşub, ölən və xəsarət alanlar var.
Qaradağ rayon Polis İdarəsindən Trend-ə verilən məlumata görə, bir neçə saat əvvəl "Sədərək" Ticarət Mərkəzinin yaxınlığında "Mercedes" markalı sərnişin avtobusu "Kamaz" markalı yük maşını ilə toqquşub və aşıb.
İlkin məlumata görə, hadisə zamanı ölən olmayıb, xəsarət alanlar var. İdarədən xəsarət alanların dəqiq sayı barədə məlumat olmadığı bildirilib.
Bakı şəhər Təcili və Təxirəsalınmaz Tibbi Yardım Stansiyasının baş həkimi Mürsəl Həmidov isə Trend-ə bildirib ki, hadisə yerində bir naməlum qadın meyiti olub. Həkimlər hadisə yerində 3 yaralıya yardım göstərib, iki nəfər isə Kliniki Tibbi Mərkəzə yerləşdirilib. Onlardan birinin vəziyyəti ağır, digərinin vəziyyəti isə orta ağırdır.
Şahidlərin hadisə yerindən verdiyi məlumata görə, 3 nəfər ölüb, 30 nəfərə yaxın xəsarət alıb. Hadisəyə səbəb avtobusun yol hərəkət qaydasını pozması olub.
Qaradağ rayon prokurorluğundan da Trend-ə bildiriblər ki, hadisə nəticəsində 3 nəfər ölüb.
Akademik Mirqasımov adına Respublika Klinik Xəstəxanasının baş həkiminin müavini Mahir Babayev Trend-ə deyib ki, bu xəstəxanaya qəzada xəsarət almış 7 xəstə daxil olub. Hazırda onların vəziyyəti ağır stabildir. Xəsarət alanlarda, əsasən, ətrafların əzilmələri müşahidə edilir.
Bakı Baş Səhiyyə İdarəsinin rəis müavini Rauf Nağıyev isə Trend-ə deyib ki, hadisə nəticəsində xəsarət alanların sayı hələ tam məlum deyil. Çünki hadisədən sonra yaralanan şəxslər ayrı-ayrı vətəndaşlara məxsus maşınlarla daşınıb.
Şahidlərin Youtube-dakı videokadrlarından istifadə edilib