Azərbaycan, Bakı, 22 iyul /Trend/
Quba rayonunun Amsar kəndi ərazisində "VAZ 2106" və "VAZ 21011" markalı avtomobillərin toqquşması nəticəsində 6 nəfər xəsarət alıb.
Trend Regional TV-yə istinadən məlumat verir ki, hadisə Quba-Nügədi yolunun Quba rayonunun Amsar kəndi ərazisindən keçən hissəsində baş verib. 31 yaşlı Quba rayon sakini Rəsul Rəsulovun idarə etdiyi "44 BE 149" qeydiyyat nişanlı "VAZ 21011" markalı nəqliyyat vasitəsi 35 yaşlı Xaçmaz rayon sakini Rövşən Qədirovun idarə etdiyi "10 NX 436" qeydiyyat nişanlı "VAZ 2106" markalı avtomobilə çırpılıb.
Nəticədə hər iki sürücü və avtomobillərdə olan 4 nəfər sərnişin müxtəlif dərəcəli xəsarət alaraq Quba Mərkəzi Rayon Xəstəxanasına çatdırılıb. Yaralılara ilkin yardım göstərildikdən sonra onlar ambulator qaydada müalicəyə buraxılıb.
İlkin ehtimala görə, qəza yüksək sürət və hər iki nəqliyyat vasitəsinin yol hərəkəti qaydasını pozması səbəbindən baş verib. Quba Rayon Polis Şöbəsində aparılan araşdırmaların sonunda hadisəyə hüquqi qiymət veriləcək.