Azərbaycan, Bakı, 13 oktyabr /Trend, müxbir E.Tarıverdiyeva/
Dağlıq Qarabağ münaqişəsi üzrə danışıqlarda irəliləyişin olmamasında günah əsas etibarilə Ermənistan hakimiyyətindədir; belə ki, bu ölkəyə mövcud münaqişəni təhrik edən insanlar rəhbərlik edir, - Rusiya Dövlət Humanitar Universiteti yanında Qafqazşünaslıq Mərkəzinin rəhbəri, Trend-in Ekspertlər Şurasının üzvü İsmayıl Ağakişiyev belə hesab edir.
"Bu gün Ermənistanda hakimiyyət prioriteti Ermənistan diasporu prioriteti ilə üst-üstə düşür", - bu barədə çərşənbə günü Ağakişiyev Trend Agentliyində jurnalistlərlə görüşündə deyib.
Onun sözlərinə görə, Ermənistanda hakimiyyət dəyişikliyi Dağlıq Qarabağ münaqişəsinin həllinə müsbət təsir göstərə bilər, lakin buna tamamilə əmin olmaq mümkün deyil.
"Bu gün Azərbaycan zəngin ölkədir, Ermənistanda isə hakim dairələrdə parçalanma gedir ki, onların da bir hissəsi ölkədə iqtisadi vəziyyəti yaxşılaşdırmaq üçün kompromisə getməyə hazırdır", - o deyib.
Bundan əlavə, onun sözlərinə görə, münaqişənin həllində Türkiyənin fəal iştirakı müsbət rol oynayır; belə ki, bu ölkə daim Azərbaycanı dəstəkləyib.
"Bu məsələdə Rusiyanın mövqeyindən də çox şey asılıdır. Rusiya ilə Azərbaycan arasında gələcəkdə daha da möhkəmlənəcək gözəl münasibətlər var. Bundan əlavə, mənim fikrimcə, Rusiya və Türkiyə tandemi münaqişənin həllində müsbət rol oynaya bilər", - Ağakişiyev deyib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır.
1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.