Azərbaycan, Bakı, 22 aprel /Trend, müxbir M.Əliyev/
NATO-nun Parlament Assambleyasının yaz sessiyasında erməni snayperi tərəfindən qətlə yetirilmiş azərbaycanlı uşaq Fariz Bədəlovla bağlı müzakirələr aparılacaq. Trend-in məlumatına görə, bu barədə hakim Yeni Azərbaycan Partiyasının rəsmi saytına Azərbaycanın qurumdakı nümayəndə heyətinin üzvü Siyavuş Novruzov bildirib.
"Sessiya çərçivəsində siyasi, təhlükəsizlik və müdafiə komitələrində Ermənistan-Azərbaycan, Dağlıq Qarabağ münaqişəsi müzakirə olunacaq", - Novruzov bildirib.
Onun sözlərinə görə, Ermənistan tərəfinin beynəlxalq hüququn normalarını və prinsiplərini, eləcə də atəşkəs rejimini davamlı pozduğu barədə da fikir mübadiləsi aparılacaq.
Ermənistan Silahlı Qüvvələrinin martın 8-də saat 17:00-18:00 radələrində Ağdamın işğal altında olan Şıxlar kəndi istiqamətində atəşkəsi pozması nəticəsində Orta Qərvənd kəndinin 9 yaşlı sakini Fariz Arif oğlu Bədəlov həyətdə oynayarkən aldığı güllə yarasından ölüb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.