Azərbaycan, Bakı, 1 oktyabr /Trend, müxbir M.Əliyev/
ATƏT-in Minsk qrupunun fəaliyyətinin dayandırılması ilə bağlı Milli Məclis qərar qəbul etməlidir. Trend-in məlumatına görə, bunu Milli Məclisin payız sessiyasının ilk iclasında Fəzail Ağamalı deyib.
O qeyd edib ki, Ramil Səfərovun azadlığa buraxılması ilə bağlı beynəlxalq təşkilatlar, o cümlədən ATƏT-in Minsk qrupu ikili standartlardan çıxış etdi. "Həmin təşkilatlar tarix boyu ermənilərin azərbaycanlılara qarşı cinayətlərinə göz yumub, Azərbaycan zabitinin kifayət dəqər cəza çəkdikdən sonra azdlığa buraxılmasını şişirdirlər. Onsuz da ATƏT-in Minsk qrupu Dağlıq Qarabağ münaqişəsinin həll olunması istiqamətində qeyri-obyektiv prizmadan çıxış edib", - millət vəkili bildirib.
Ağamalı təəssüflə qeyd edib ki, ATƏT və bir sıra beynəlxalq təşkilatlar Ermənistanı işğalçı dövlət kimi hələ tanımayıb.
"Ötən 20 ildə ATƏT-in Minsk qrupu münaqişənin həlli ilə bağlı heç bir irəliləyişə nail olmayıb. Ona görə də, təklif edirəm ki, ATƏT-in Minsk qrupunun fəaliyyətinin dayandırılması ilə bağlı qərar qəbul edilsin", - deputat deyib.