...

Cənubi Qafqaz Parlament Təşəbbüs Qrupu fəaliyyətini davam etdirəcək

Siyasət Materials 14 Fevral 2008 16:33 (UTC +04:00)

Azərbaycan, Bakı, 14 fevral / Trend İ.Əlizadə/ Cənubi Qafqaz Parlament Təşəbbüs Qrupu fəaliyyətini davam etdirəcək. "Ermənstan Qrupda fəaliyyətini davam etdirməyə ilkin razılıq verib. Ona görə Qrup fəaliyyətini davam etdirəcək", -deyə cümə axşamı Trend ə açıqlamasında Azərbaycanın Cənubi Qafqaz Parlament Təşəbbüs Qrupundakı nümayəndə heyətinin rəhbəri, hakim Yeni Azərbaycan Partiyası (YAP) icra katibinin müavini Siyavuş Novruzov bildirib.

Ötən il mayın 12-də Ermənistanda keçirilən parlament seçkilərindən sonra bu ölkə Cənubi Qafqaz Parlament Təşəbbüs Qrupundakı nümayəndə heyətini formalaşdırmayıb. LİNKS təşkilatının və Avropa İttifaqının rəhbərliyi nümayəndə heyətinin formalaşdırılması ilə bağlı bir neçə dəfə Ermənistana müraciət edib. Lakin Ermənistan müraciətlərə müsbət cavab verməyib.

Cənubi Qafqaz Parlament Təşəbbüs Qrupu Böyük Britaniyanın LİNKS qeyri-hökumət təşkilatının təşəbbüsü ilə yaradılıb. Məqsəd üç Cənubi Qafqaz ölkəsi arasında əlaqələri genişləndirməkdir və bu, Avropa Şurası və Avropa İttifaqı tərəfindən də dəstəklənir. Qrupda Azərbaycan, Gürcüstan və Ermənistanın hər birindən 10 millət vəkili təmsil olunur. Qrupun rəhbəri altı aydan bir dəyişir. Hazırda Qrupa Azərbaycan sədrlik edir. Nizamnaməyə görə, Qrupun iclasları ildə iki dəfədən az olmayaraq keçirilməlidir.

Novruzov qeyd edib ki, LİNKS rəhbəri Denis Sammut bu həftə Ermənistanda səfərdə olub və Cənubi Qafqaz Parlament Təşəbbüs Qrupunun fəaliyyətinin davam etdirilməsi ilə bağlı müzakirələr aparıb.

"Sammut Ermənistan parlamentinin rəhbərliyi və hökumət rəsmiləri ilə müzakirələr aparıb. Danışıqlar nəticəsində, Ermənistanda keçiriləcək prezident seçkisindən sonra bu ölkəni Cənubi Qafqaz Parlament Təşəbbüs Qrupunda təmsil edəcək parlament nümayəndə heyətinin formalaşdırması ilə bağlı razılıq əldə olunub", - deyə millət vəkili əlavə edib.

Novruzov qeyd edib ki, Azərbaycan Cənubi Qafqaz Parlament Təşəbbüs Qrupunun fəaliyyətini davam etdirməsində maraqlıdır: "Qrupun toplantılarında gündəmə gətirdiyimiz məsələlər Gürcüstan tərəfindən də müdafiə olunur və Ermənistan orada təklikdə qalıb. Ona görə də Ermənistan Qrupun toplantılarında iştirak etmək istəmir".

Onun sözlərinə görə, Ermənistanda keçiriləcək prezident seçkisindən sonra Cənubi Qafqaz Parlament Təşəbbüs Qrupunun növbəti iclası keçiriləcək. İclasın keçiriləcəyi yer, tarix və gündəliyi yaxın günlərdə dəqiqləşdiriləcək.

Xəbər lenti

Xəbər lenti