Azərbaycan, Şəki, 21 fevral / Trend , müxbir E.Quliyev/ Azərbaycan Milli Təhlükəsizlik Nazirliyinin (MTN) Balakən rayon şöbəsi və Balakən rayon Polis Şöbəsinin (RPŞ) birgə keçirdiyi əməliyyat zamanı rayon ərazisində yayımı qadağan olunan dini kitablar aşkarlanıb. Bu barədə cümə axşamı Trend a Balakən rayon Polis Şöbəsindən məlumat verilib.
Ötən il Dini Qurumlarla İş üzrə Dövlət Komitəsi Azərbaycanda 750 adda dini ədəbiyyata baxıb və dini dözümsüzlüyü və ayrıseçkiliyi təbliğ edən 140 adda kitabın ölkəyə idxalının və yayılmasının qarşısını alıb.
Məlumata görə, keçirilən əməliyyat zamanı rayonun Şanbul kənd sakini Mahama Çixinovun mənzilindən 312 ədəd qadağan olunmuş dini ədəbiyyat və 12 ədəd video kaset aşkarlanıb. əməliyyatçılar, həmçinin rayonun Xalatala kənd sakini İdris Çitiyevin mənzilində axtarış apararkən oradan da müxtəlif adda 107 ədəd radikal vəhabi dini təriqətinə məxsus qadağan olunmuş dini ədəbiyyat və bir video kaset aşkar ediblər.
Hazırda əməliyyat tədbirləri davam etdirilir.
Balakən paytaxt Bakıdan 448 kilometr şimal-qərbdə yerləşir.
