Azərbaycan, Bakı,31 mart / Trend , müxbir R.Hafizoğlu / İraqın Bəsrə şəhərində hökumət qüvvələri ilə şiə müqavimət hərəkatı "Mehdi Ordusu" arasında baş vərən qanlı toqquşmaların qarşısını dialoq ala bilər. "Bəsrədə stabilliyin bərqarar olması üçün İraq hökuməti "Mehdi ordusu" ilə danışıqlara getməlidir" - deyə iraqlı müstəqil politoloq Riyad əl-Qəyyim Trend a bildirib.
Əl-Cəzirə telekanalının martın 30-da verdiyi məlumata əsasən, İraqın Baş naziri Nuri əl-Maliki ölkədə fəaliyyət göstərən "Mehdi Ordusu"nun "Əl-Qaidə" terror təşkilatından daha təhlükəli olduğunu bildirərək, onları dəstəkləyən dövlətlərdən və qurumlardan maliyyə və silah dəstəyini dayandırmağı tələb edib. Maliki "Mehdi Ordusu"nu silahları təhvil verərək təslim olmağa çağırıb. "Mehdi Ordusu"nun mətbuat katibi Heydər əl-Cabir Baş nazir əl-Malikinin təslim olma tələbini rədd edərək, Bəsrədən çıxmayacaqlarını bildirib.
"İraq hökuməti Bəsrədə baş verənlərin qarşısını almaq iqtidarında deyil" - deyə əl-Qəyyim bazar ertəsi Bağdaddan elektron poçtla bildirib. Ekspert hesab edir ki, hökumət qüvvələrinin "Mehdi Ordusu"na qarşı mübarizə apara bilməməsinin səbəbi İraq ordusunda bu hərəkat ilə sıx əməkdaşlıq edən qüvvələrin olmasıdır.
Politoloqun fikrincə, Bəsrədə baş verən hadisələrin arxasında İran durur. ""Əl-Qaidə" terrorçularından fərqli olaraq, "Mehdi Ordusu" daha nizamlı və mütəşəkkil fəaliyyət göstərir" - deyə o qeyd edib. Əl-Qəyyimin fikrincə, İran İraqa və koalisiya qüvvələrinə gücünü nümayiş etdirmək üçün "Mehdi Ordusu"nu və onlardan məzhəb etibarı ilə fərqlənən "Əl-Qaidə" terrorçularını da dəstəkləyir.
İraqın Kərkük Strateji Araşdırmalar Mərkəzinin direktoru, politoloq Əhməd Təqiy də hesab edir ki, Bəsrədə baş verən qanlı toqquşmaların arxasında İran durur. "İraqda stabilliyin olmamasında ən çox İran maraqlıdır. İran ölkədə stabilliyin olmamasından istifadə edərək regionda öz təsir dairəsini genişləndirmək niyyətindədir" - deyə Təqiy bazar ertəsi Bağdaddan elektron poçtla Trend a bildirib.
Politoloq hesab edir ki, Baş nazir əl-Malikinin "Mehdi Ordusu"nu "Əl-Qaidə" terrorçularından daha təhlükəli adlandırması, bir qədər sərt səslənir. ""Əl-Qaidə" terrorçularından fərqli olaraq, "Mehdi Ordusu" ilə danışıqların aparılması mümkündür" - deyə Təqiy qeyd edib.
Politoloq hesab edir ki, Bəsrədə qanlı toqquşmaların qarşısını almaq üçün hökumət "Mehdi Ordusu" ilə dialoqlara başlamalıdır.
KİV-in verdiyi məlumatlarda Bəsrədə martın axırlarında "Mehdi Ordusu" ilə hökumət qüvvələri arasında olan silahlı toqquşmalar zamanı 200 nəfərin öldüyü bildirilir. Martın 18-də İraqın XİN başçısı Xoşyar Zəbari İngiltərənin "Channel4"də verdiyi müsahibədə Bəsrədə yerləşən İngiltərə hərbi qüvvələrini fəaliyyətsizlikdə ittiham edərək, onları Bəsrənin terrorçular tərəfindən işğal edilməsi üçün şərait yaratmaqda günahlandırıb.
Məqalə müəllifi ilə əlaqə: trend