Azərbaycan, Bakı, 01 aprel / Trend ", müxbir İ.Əlizadə/ Azərbaycan Parlamentinin sədri Oqtay Əsədovun aprelin 2-5-də Sankt-Peterburqa səfər proqramı açıqlanıb. "Parlamentin sədri MDB Parlamentlərarası Assambleyasının 30-cu plenar iclasında iştirak etmək üçün 2-5 aprel tarixində Sankt-Peterburqda səfərdə olacaq" - deyə çərşənbə axşamı keçirdiyi brifinqdə Parlamentin mətbuat katibi Asif Nəsirov bildirib.
Onun sözlərinə görə, Azərbaycan Parlamentinin sədri MDB Parlamentlərarası Assambleya Şurasının iclasında da iştirak edəcək. Milli Məclisin sədri Sankt-Peterburqa səfər çərçivəsində Avropa Şurası Parlament Assambleyasının prezidenti, ATƏT-in Parlament Assambleyasının sədri Qoran Lenmarker, Ukrayna, Moldova parlament sədrləri, Rusiya Dövlət Dumasının sədri Boris Qrızlov, Rusiya Federasiya Şurasının sədri Sergey Mironovla görüşəcək. Görüşlərdə ikitərəfli əlaqələrin genişləndirilməsi məsələləri müzakirə olunacaq.
Nəsirov bildirib ki, Ermənistan və Gürcüstan parlament sədrlərinin MDB Parlamentlərarası Assambleyasının iclasında iştirak edib-etməyəcəyi dəqiqləşməyib, ona görə də hələlik Əsədovun bu ölkələrin parlament sədrləri ilə görüşləri planlaşdırılmır.
