Azərbaycan, Bakı, 17 aprel/ Trend , müxbir İ.Əlizadə/ Azərbaycanlı politoloqlar hesab edirlər ki, ABŞ-ın Koliforniya ştatının rəhbərliyi ştatda yaşayan ermənilərin lobbi təşkilatlarının təsiri altında fəaliyyət göstərir. "Koliforniya ştatında böyük erməni icması var. Ştatın qubernatoru Arnold Şvartsneqr erməni icmasının təsir altındadır və öz fəaliyyətini onların maraqları üzərində qurur", - deyə cümə axşamı Trend a açıqlamasında Demokratik İslahatlar Partiyasının sədri, deputat Asim Mollazadə bildirib.
ABŞ-ın Koliforniya ştatının qubernatoru Şvartsneqr aprelin 20-27-sini qondarma "erməni soyqırımı"nın anım həftəsi elan edib.
Mollazadə qeyd edib ki, Koliforniyada yaşayan azərbaycanlı və türk diasporları əsl həqiqətlər haqda ABŞ cəmiyyətinə məlumat verməlidirlər: "Bununla qondarma "erməni soyqırımı" ilə bağlı kampaniyaların qarşısını almaq olar".
Onun fikrincə, Koliforniya ştatı rəhbərliyinin ermənipərəst siyasət yürütməsinin başqa bir səbəbi ştatda yaşayan Azərbaycan icmasının zəif fəaliyyət göstərməsidir.
Politoloq Rasim Musabəyov isə hesab edir ki, əsas məsələ ABŞ-ın qondarma "erməni soyqırımı"nı tanımamasıdır: "Hansısa ştatın "erməni soyqırımı" həftəsi elan etməsi rəsmi Vaşinqtonun siyasətinə təsir göstərə bilməz".
Məqalə müəllifi ilə əlaqə ünvanı: [email protected]
