Azərbaycan, Bakı, 14 may / Trend , müxbir E.Babayev/ Müxalifəti təmsil edən "Azadlıq" blokunun qarşıdakı prezident seçkisində iştirakı gözləniləndir. "Hazırda blokda heç də yüz faizlik boykot yolu tutmaq əhval-rühiyyəsi yoxdur, seçkidə iştirak etmək və etməməklə bağlı rəylər bərabərdir" - çərşənbə günü Trend a blokun üzvü, Vətəndaş və İnkişaf Partiyasının (VİP) sədri Əli Əliyev deyib.
Azərbaycanda prezident seçkisi oktyabrın 15-də keçiriləcək. "Azadlıq" blokunda üçmüxalifət partiyası- Azərbaycan Xalq Cəbhəsi (AXCP), Liberal (ALP), Vətəndaş və İnkişaf (VİP) partiyaları təmsil olunur.
Seçki Məcəlləsinə əlavə və dəyişiklikləri nəzərdə tutan layihə mayın sonunda Milli Məclisdə müzakirə olunacaq.
Əliyev bildirib ki, blok ayın sonlarında seçkilərlə bağlı yekun müzakirələr aparmaq niyyətindədir. "Seçki ilə bağlı ciddi müzakirələr aparıldıqdan sonra, yekun qərar verilməlidir. Azərbaycanda keçiriləcək seçkilərə diqqət artıb. Beynəlxalq aləm tərəfindən son vaxtlar verilən bəyanatlar bunun bariz nümunəsidir" - deyən Əliyev bildirib ki, blokun yekun qərarının nədən ibarət olmasına Seçki Məcəlləsinə ediləcək əlavə və dəyişikliklərin də təsiri olacaq.
VİP 2006-cı ildə təsis olunub. Həmin vaxta qədər bu partiyanın üzvləri Azərbayan Milli İstiqlal Partiyasında (AMİP) təmsil olunublar. AMİP-də baş vermiş parçalanma nəticəsində, Əli Əliyevin tərəfdarlı öz qurultaylarını keçirərək, VİP-i təsis ediblər. VİP-in "Azadlıq" siyasi blokunun üzvüdür.
Müxalif Klassik Xalq Cəbhəsi Partiyası (KXCP) da seçkidə iştirak qərarına baxmağı planlaşdırır. "Biz seçki qanunvericiliyi ilə bağlı təkliflərimizi Milli Məclisə, səfirliklərə göndərmişik və həmin təkliflər layihənin müzakirəsi zamanı nəzərə alınmasa, seçkini boykot məsələsi müzakirə olunacaq" - çərşənbə günü Trend a partityanın sədri Mirmahmud Mirəlioğlu deyib.
Mirəlioğlu deyib ki, təkliflər nəzərə alınmasa və layihəyə dəyişikliklər yalnız hakimiyyətin maraqları çərsivsəində olsa, KXCP Ali Məclisində seçkidə iştirak məsələsi müzakirə ediləcək. "İndiki mövqeyimiz seçkidə iştirakın daha doğru olmasından ibarətdir. Məcəlləyə dəyişikliklərdən sonra parttiyanın Məclisinin münasibəti açıqlanacaq" - deyə o qeyd edib.
2006-cı ilin mart ayında Klassik Xalq Cəbhəsi Partiyasının təsis qurultayı keçirilib. Həmin vaxta qədər partiya Azərbaycan Xalq Cəbhəsi Partiyası adına iddia edirdi və "klassiklər" AXCP-si kimi tanınırdı. Azərbaycanın eks-prezidenti, AXCP-nin sədri Əbülfəz Elçibəyin müavini olmuş Mirmahmud Mirəlioğlu, 2000-ci ildə partiyanın iki yerə parçalanmasından sonra, "klassiklər" qanadına sədrlik edib. 2006-cı ildə partiyanın adında dəyişiklik edilərək, KXCP adlandırılıb.
Məqalə müəllifi ilə əlaqə ünvanı: [email protected]
