Azərbaycan, Bakı,15 may / Trend , müxbir R.Hafizoğlu/ Ərəb Ölkələri Liqasının Livanda "Hizbullah" təşkilatı ilə hökumət qüvvələri arasında yaranmış qarşıdurmanı həll etmək cəhdləri uğursuzluqla nəticələnə bilər.
"Ərəb Ölkələri Liqası Livanda baş verən qarşıdurmanın qarşısını almaq iqtidarında deyil" - deyə livanlı politoloq Vail əl-Yəmin Trend -a bildirib.
Ərəb Ölkələri Liqası Livanda hökumət qüvvələri ilə "Hizbullah" təşkilatı arasında yaranmış qarşıdurmanın aradan qaldırılması üçün paytaxt Beyrutda növbədənkənar toplantı keçiriblər. Bu haqda məlumatı mayın 14-də Əl-Cəzirə telekanalı yayıb.
"Ərəb Ölkələri Liqası bir çox dini təşkilatlar və xalq arasında o qədər də nüfuza malik deyil" - deyə Livandakı "14-mart" hərəkatının politoloqu əl-Yəmin cümə axşamı Beyrutdan telefonla bildirib.
Politoloqun fikrincə, hökumət "Hizbullah"ın bundan sonra ölkədaxili silahlı münaqişələrdə iştirak etməyəcəyi barədə zəmanət istəyir.
"Ərəb Liqası Livan hökumətinə "Hizbullah" silahlıları ilə bağlı zəmanət vermək iqtidarında deyil. Livandakı qarşıdurmanın sona çatması üçün Liqa "Hizbullah"a dəstək olan Dəməşq ilə danışıqlar aparmalıdır" - deyə politoloq bildirib. Əl-Yəmin hesab edir ki, Tehran və Dəməşqin dəstək olduğu "Hizbullah"ın qarşısı alınmasa, ölkədəki qarşıdurma dinlər və məzhəblərarsı müharibəyə çevrilə bilər.
Digər livanlı politoloq Rəhim Beyram da hesab edir ki, Ərəb Liqasının Livandakı qarşıdurmanın qarşısını almaq cəhdləri uğursuzluqla nəticələnəcək. "Ərəb Liqasının bu vaxta qədər hər hansı bir münaqişənin həllində vasitəçi qismində çıxış etməsi müsbət nəticə verməyib" - deyə Beyram cümə axşamı Beyrutdan elektron poçtla Trend -a bildirib.
Politoloq hesab edir ki, Ərəb Liqası ölkələri Livandakı böhranlı vəziyyətin həllində yekdil fikrə malik deyillər. "Ərəb liderləri Livanda stabilliyin olmasını istəyirlərsə, ilk növbədə Dəməşqi İranın təsirindən qoparmağı bacarmalıdırlar" - deyə o əlavə edib. Politoloqun fikrincə, Livandakı böhranlı vəziyyətin həlli Suriya və İranın əlindədir.
Livanda hökumət və müxalifət qüvvələri arasındakı qarşıdurma mayın 10-dan etibərən silahlı münaqişəyə çevrilib. Livan KİV-in məlumatına görə, "Hizbullah" təşkilatı və Livan hökuməti arasında baş verən toqquşmalar nəticəsində bu günədək ümumilikdə 80 nəfər həlak olub, 300 nəfərdən çox mülki vətəndaş xəsarət alıb.
Məqalənin müəllifi ilə [email protected] ünvanı ilə əlaqə saxlaya bilərsiniz.
