Azərbaycan, Bakı, 16 may / Trend , müxbir E.Babayev/
Azərbaycanın müxalif Xalq Cəbhəsi partiyasının qərargah problemi yaxın vaxtlarda həllini tapa bilər. "Bu istiqamətdə işlər intensivləşdirilib, müəyyən özəl qurumlarla əlaqələrimiz olub və qərargah problemləri partiyanın öz imkanları çərçivəsində həll olunacaq",- deyə cümə günü Trend a AXCP Ali Məclisinin sədri Qulamhüseyn Əlibəyli bildirib.
2006-cı ilin noyabrında bir neçə qurum, o cümlədən AXCP Xaqani küçəsi 33 ünvanından çıxarılıb. Bundan sonra AXCP müvəqqəti olaraq ADP-nin qərargahında məskunlaşıb. Ötən il partiya buranı da tərk edib. Hazırda partiyaya məxsus əşyalar təşkilat üzvlərinin evlərində yerləşidirilib.
Əlibəyli deyib ki, partiya qərargah problemi ilə bağlı dövlət strukturlarına hər hansı müraciət etmək niyyətində deyil. "Bunun səbəbi bu müraciətlərə müsbət cavab verilməyəcəyinə əmin olmağımızdır və bu istiqamətdə işləri tam dayandırmışıq" - deyən Əlibəyli qərargahla bağlı özəl qurumlarla aparılan danışıqların detallarına toxunmayıb.
AXCP hazırda "Azadlıq" siyasi blokunun üzvü və həmtəsisçisidir. Partiyanın qurucusu və 2000 -ci ilədək sədri Azərbaycanın keçmiş prezidenti mərhum Əbülfəz Elçibəy olub. 2000-ci ildən indiyədək AXCP-yə keçmiş Dövlət Katibi, sabiq deputat Əli Kərimli sədrlik edir.
Məqalə müəllifi ilə əlaqə saxlamaq üçün ünvan - [email protected]
