Azərbaycan, Bakı, 02 iyun / Trend , müxbir D.Xatınoğlu/ İran prezidenti ilə fikir ayrılığına görə vəzifəsindən uzaqlaşdırılmış İran Təhlükəsizlik Şurasının sabiq sədri Əli Laricaninin spiker seçilməklə yenidən siyasi fiqura çevrilməsi, onunla prezident Mahmud Əhmədinejad arasında ciddi rəqabətin başlanması ehtimalını gücləndirəcək. "İran prezidenti və yeni spiker arasında siyasi rəqabət konfliktlə nəticələnəcək "- deyə, İran politoloqu İsa Səhərxiz Trend -a bidlirib.
İranın sabiq nüvə proqramı üzrə Qərb ilə müzakirə heyətinin rəhbəri Laricani Əhmədinejad ilə fikir ayrılığına görə, keçən ilin oktyabrında vəzifəsindən uzaqlaşdırılıb. İranın İRNA Agentliyinin məlumatına əsasən, növbəti çağırış Parlamentinin bazar günü spiker seçkilərində Laricani qalib gəlib. Parlamentin səsvermədə iştirak edən 266 nümayəndəsindən 237 nəfəri Laricaniyə səs verib.
"Hələlik qısa müddətdə, Parlamentin hakimiyyətə birmənalı şəkildə dəstək verməsi davam etdirilsə də, bu uzun sürməyəcək"-deyə, Səhərxiz bazar ertəsi telefonla Tehrandan bildirib.Onun sözlərinə görə, Laricani və Əhmədinejad arasında fikir ayrılıqları, xüsusilə də nüvə proqramı ilə bağlı olaraq, dərinləşəcək və bu məsələ onların qarşıdurması ilə nəticələnək. "Yəqin ki, bir müddətdən sonra, Əhmədinejadin Parlamentə etirazları artacaq. Parlament nümayəndələrinin əksəriyyəti hakim partiya olan "Usulgəra" koaliasiyasından olsalar da, Əhmədinejadın uğursuz xarici və daxili siyasəti ucbatından, prezidentdən çox narazıdırlar" - deyə, İran politoloqu bildirib.
Səhərxiz hesab edir ki, Laricani Parlamentdə ilk çıxışında MAQATE sədrini tənqid etməsi ilə, xarici siyasətdə güclü fiqur olduğunu göstərib. " Qərb ölkələri İran hakimiyyəti ilə münasibətdən çəkindiklərinə görə, Laricani bu əlaqələri Parlament vasitəsilə həyata keçirmək istəyir. Bu məsələlər Laricani və Əhmədinejadın rəqabətinə səbəb olacaq" - deyə, Səhərxiz bildirib.
" Kimin spiker olacağından asılı olmayaraq, növbəti parlamentdə müxtəlif fikirli cinahlar var və keçmişdəki kimi, hakim partiyanı tam dəstəkləməyəcəklər"- deyə, İanın sabiq deputatı Mehrəngiz Mürüvvəti spiker seçkisi öncəsi Trend -a bildirimişdi. Onun sözlərinə görə, hazırki Parlament hakimiyyəti daha diqqətlə nəzarətdə saxlayacaq və Əhmədinejadın təkbaşına verdiyi qərarlara mane olacaq. "Belə düşünürəm ki, Parlamentdə Əhmədinejadın səhv siyasətindən narazıların sayı artacaq. İran prezidenti iqtisadi, xarici siyasət və nüvə məsələsində uğurlu nəticələr əldə edə bilməyib. Buna görə də, onun mövqeyi getdikcə zəifləyəcək"-deyə, Mürüvvəti bildirib.
İran İnqilabından sonra 8 -ci dəfədir ki parlament seçkiləri keçirlib. Seçkilərdə hakim partiya yerlərin 71% -nə yiyələnsə də, hakim partiyanın bir çox üzvləri Əhmədinejadın yürütdüyü siyasəti tənqid edirlər. Laricani Əhmədinejadla eyni partiyadan olsa da, onunla müqayisədə daha mühafizəkar və praqmatikdir.