Azərbaycan, Bakı, 24 iyul/ Trend , müxbir Ü.Sadıxova, R.Hafizoğlu/ ABŞ və İraq təhlükəsizlik haqda müqavilənin imzalanmasını İraqdakı nisbi sabitliyin pozulmasından ehtiyat edərək təxirə salırlar.
"İraq və ABŞ arasında təhlükəsizlik haqda ikitərəfli müqavilənin hələ də imzalanmamasının əsas səbəbi İraq xalqının bu müqavilənin əleyhinə olmasıdır", - deyə iraqlı millət vəkili Fövzi Əkrəmoğlu Trend -a bildirib.
Vaşinqton heç bir səbəb göstərmədən ABŞ və İraq arasında təklükəsizlik haqda imzalanacaq ikitərəfli müqavilənin bu ayın axırınadək təxirə salındığını bildirirb. Təhlükəsizlik haqda razılaşmaya əsasən, ABŞ hərbçilərinin İraqda qalma müddəti 2016-cı ilə qədər uzadıla bilər. Bu haqda məlumatı iyulun 23-də "Əl-Cəzirə" telekanalı verib.
İngiltərənin Durham Universtitetinin Yaxın Şərq və ərəb ölkələri üzrə eksperti Kristofer Devidson isə hesab edir ki, müqavilənin imzalanmasını uzadan əsas səbəb ABŞ-da keçiriləcək yeni prezident seçkiləri ilə bağlıdır.
"İraqda və ABŞ daxilində bir sıra ziddiyyətlər olduğu üçün Vaşinqton bu müqavlənin imzalanması vaxtının uzadılmasında maraqlıdır", - deyə Devidson cümə axşamı Londondan telefonla bildirib.
O hesab edir ki, müqavilənin imzalanması İraqda vəziyyəti gərginləşdirə bilər. Bu isə ABŞ-ın maraqlarına ziddir.
Əkrəmoğlu da belə düşünür ki, İraq hökuməti daxili sabitliyi qorumaq məqsədilə bu müqaviləni imzalamayacaq. Onun fikrincə, müqavilənin imzalanması İraqda əldə edilmiş nisbi sakitliyin pozulması və yeni milli münaqişələrin başlaması ilə də nəticələnə bilər.
"Müqavilənin imzalanması ilə İraqın bir dövlət kimi müstəqilliyinə və süverenliyinə son qoyula bilər", -deyə Əkrəmoğlu cümə axşamı Bağdaddan telefonla Trend -a bildirib.
O hesab edir ki, Vaşinqton və Bağdad arasında imzalanacaq təhlükəsizlik müqaviləsinin iraqlılar üçün heç bir əhəmiyyəti yoxdur. Bu müqavilə işğalçıların vasitəsilə hakimiyyətə gələn qüvvələrin maraq dairəsindədir.
Müxtəlif kütləvi informasiya vəsitələrində İraqda müharibə başlayandan bu günə qədər ölən və itkin düşənlərin ümimi sayı 350 min, bəzi məlumatlara görə isə 4 milyon göstərilməkdədir.
"ABŞ-ın da müqavilənin imzalanmasında öz maraqları var. Belə ki, Vaşinqton bu müqavilə ilə İraqdakı mövcudluğunu rəsmiləşdirmək niyyətindədir", - deyə Əkrəmoğlu qeyd edib.