Azərbaycan, Bakı, 29 iyul/ Trend , müxbir E.Babayev/ Solçu Azərbaycan Sosial Demokrat Partiyasının (ASDP) həmsədri, eks-prezident Ayaz Mütəllibov bu həftə prezident seçkisində iştirak edib-etməyəcəyi barədə qərarını açıqlayacaq. "Avqustun 2-də ASDP-nin seçki ilə bağlı mövqeyi məlum olacaq", - deyə çərşənbə axşamı Trend -a ASDP-nin digər həmsədri Araz Əlizadə bildirib.
Azərbaycanda prezident seçkisi oktyabrın 15-də keçiriləcək.
Əlizadə partiyanın qərarının nədən ibarət olacağını bildirməyib. "Biz boykotun əleyhinəyik. Seçkiyə öz namizədimizlə qoşulmaq istəyirik", - deyən Əlizadə namizədin kim olması və digər bu kimi suallara isə indidən cavab vermək istəmədiyini vurğulayıb.
ASDP sol təmayüllü müxalifət partiyasıdır. Partiyanın həmsədri Əlizadə, digər həmsədri isə Azərbaycanın eks-prezidenti, hazırda mühacirətdə yaşayan Mütəllibovdur.
1991-ci ildə Azərbaycan müstəqilliyini elan etdikdən sonra Mütəllibov ilk prezident seçilib. 1992-ci ildə Xalq Cəbhəsi Hərəkatının hakimiyyətə gəlişindən sonra ölkəni tərk edib, o vaxtdan indiyədək Rusiyada mühacirətdə yaşayır.
Eks-prezident Azərbaycan Baş Prokurorluğunun ittihamı əsasında beynəlxalq axtarışa verilib. Mütəllibov dövlət çevrilişinə cəhd, qanunsuz silahlı dəstələrin yaradılması, zorla hakimiyyəti ələ almaq və digər ağır cinayətlər törətməkdə günahkar bilinir.
Məqalə müəllifi ilə əlaqə ünvanı: [email protected]
