Azərbaycan, Bakı, 14 avqust / Trend , müxbir E.Babayev/ Müxalif Azərbaycan Demokrat Partiyası (ADP) prezident seçkilərində iştirakdan imtina edən bəzi partiyaların seçkiləri müşahidə etmək niyyətində olmasını doğru saymır və bunu prosesə demokratik don geyindirmək kimi qəbul edir.
"Mən müxalifət partiyalarının seçkini müşahidə etmək barədə qərarlarını düzgün saymıram. Biz ADP olaraq nə seçkini müşahidə edəcəyik, nə də seçki ilə bağlı hər hansı ayrıca rəy verməyəcəyik" - cümə axşamı Trend -a ADP sədri Sərdar Cəlaloğlu bildirib.
Trend -un arayışı: Azərbaycanda prezident seçkisi oktyabrın 15- də keçiriləcək. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi, Açıq Cəmiyyət, Müsavat, Vətəndaş Həmrəyliyi, Demokrat, Böyük Quruluş, Azadlıq partiyaları, o cümlədən "Azərbaycan Naminə" İctimai Forumun rəhbəri Eldar Namazov seçkidə iştirakdan imtina ediblər.
Cəlaloğlu bəyan edib ki, ADP, ümumiyyətlə, seçki prosesinə hər hansı bir formada qoşulmayacaq.
Müxalif Azərbaycan Milli İstiqlal Partiyasının (AMİP) funksioneri Əli Orucov cümə axşamı Trend -a bildirib ki, hər bir partiyanın seçki prosesinə fərqli yanaşması ola bilər. "AMİP lideri Etibar Məmmədov seçkidə namizədliyini verməkdən imtina etdiyindən, öz namizədimizlə seçkiyə qoşula bilmədik. Bu heç də o demək deyil ki, AMİP seçkiyə hər hansı formada qoşulmayacaq" - deyən Orucov bildirib ki, Siyasi Şuranın növbəti iclasında seçkidə hansı formada iştirakla bağlı qərarlar veriləcək.
Bu qərarlar sırasına seçkinin müşahidə olunması, ayrı - ayır aksiyaların keçirilməsi daxil ola bilər. Onun sözlərinə görə, AMİP üzvləri seçkidə sərbəst buraxılacaqlar və onların səsvermə hüququndan məhrum edilməsi istiqamətində partiya tərəfindən hər hansı addımın atılması ehtimalı azdır.
Müxalif Müsavat Partiyası da bəyan edib ki, onlar seçkidə iştirak etməsələr də, seçkilərin müşahidəsini aparacaqlar.
"Biz müşahidəçilərimizi müəyyənləşdirmişik və bütün seçki prosesini müşahidə edəcəyik", - deyə Müsavat Partiyası Mərəkzi İcra Aparatının rəhbəri Arif Hacılı bildirib. Hacılı qeyd edib ki, Müsavat Partiyasının seçkidə iştirak etməməsi, təşkilatın prosesdən kənarda qalması demək deyil.
"Müsavat Partiyası seçki prosesini tam nəzarətdə saxlayacaq. Müşahidəçilərimiz vasitəsi ilə seçkinin nəticələrinə dair protokollrı əldə etdikdən sonra, İnsan Hüquqları üzrə Avropa Məhkəməsinə müraciət edəcəyik" - Hasılı əlavə edib.
Məqalə müəllifi ilə əlaqə ünvanı: [email protected]