Azərbayan, Bakı, 07 oktyabr/ Trend , müxbir İ.Əlizadə/ Azərbaycan müxalifətini təmsil edən sağ - mərkəzçi Müsavat Partiyasının başqanı İsa Qəmbər hesab edir ki, müxalifət qüvvələrinin əməkdaşlığında problem yoxdur.
"Azərbaycan cəmiyyətinin bugünkü problemi müxalifətlə bağlı deyil. Ölkədə çox böyük narazılıq var və müxalifət qüvvələri, partiyaları da bu narazılıqları isfadə edirlər" - çərşənbə axşamı Trend - a Müsavat Partiyasının başqanı İsa Qəmbər bildirib.
Trend - un arayışı: Müsavat Partiyası 1911 - ci ilin oktyabrında Bakıda yaradılıb. Müsavat Partiyasının III (Bərpa) Qurultayı 1992 - ci il noyabrın 7- də Bakıda Respublika sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.
Qəmbər Azərbaycan parlamentinin eks-spikeri (1992 -1993 - cü illərdə) və 2003 -cü ildə keçirilmiş prezident seçkisində prezidentliyə namizəd olub. Partiya parlamentdə dörd nəfər deputatla təmsil olunur.
Partiya başqanı bildirib ki, problem müxalifətin əməkdaşlığında deyil, hakimiyyətin həyata keçirdiyi siyasətdədir.
Qəmbər qeyd edib ki, onu müxalifətin düşdüyü hazırkı ağır vəziyyətdən necə çıxması maraqlandırmır.
"Məni Azərbaycanın vəziyyətdən necə çıxması maraqlandırır. Çünki müxalifətlə bağlı ciddi bir problem görmürəm. Ölkədə ciddi dəyişikliklər edilməsə, iqtisadi, siyasi sahədə azadlıqların məhdudlaşdırılmasına son qoyulmasa, rəsmi Bakı öz strateji seçimini etməsə, Avratlantik məkana inteqrasiyasını sürətləndirməsə, Azərbaycanı yaxın dövrdə çox çətin günlər gözləyir", - deyə o əlavə edib.
Qəmbər Bakı Şəhər İcra Hakimiyyətinin müxalifətin şəhərin mərkəzində kütləvi etiraz aksiyaları keçirməsinə icazə verməməsini qanunsuz hesab edir. O deyib ki, demokratik qüvvələrin kütləvi tədbirlərinə icazə verilməməsi hakimiyyətin müxalifətdən nə dərəcədə çəkindiyini nümayiş etdirir.
"Bu baxımdan, Bakı Şəhər İcra Hakimiyyəti rəhbərliyinin müraciətlərimizə mənfi cavab verməsi özü - özlüyündə çox ciddi bir göstəricidir, cəmiyyətə və beynəlxalq birliyə ciddi mesajdır. Ölkədə hakimiyyətlə müxalifət arasında qüvvələrin gercək nisbəti haqqında çox önəmli mesajıdır".
Qəmbər beynəlxalq təşkilatların Azərbaycandakı vəziyyətə münasibətinin müxalifəti qane etdiyini vurğulayıb.
"Beynəlxalq təşkilatların Azərbaycandakı vəziyyətə münasibəti məlumdur. Beynəlxalq birlik Azərbaycandakı hakimiyyətin, istər iqtisadi və siyasi sahədəki bərbad siyasəti, istərsə də, beynəlxalq arenadakı mövqeyi ilə razılaşmaq fikrində deyil. Hesab edirəm ki, bu da beynəlxalq birliyin müxtəlif addımlarında, bəyanat və açıqlamalarında özünü göstərməyə başlayıb. Bu da kifayət qədər aydın şəkildə ictimaiyyətə təqdim olunur", -deyə başqan əlavə edib.
Hakim Yeni Azərbaycan Partiyası (YAP) icra katibinin müavini, millət vəkili Siyavuş Novruzov Trend -a bildirib ki, Qəmbərin fikirləri səhv və qərəzlidir.
"Bütün cəmiyyətə məlumdur ki, nəyinki müxalifət arasında, heç müxalifət partiyalarının daxilində birlik yoxdur. Müxalifət partiyalarında 1-2 nəfər rəhbərliyi zəbt edib, partiyaları şəxsi müəssisələrinə çeviriblər", - deyə YAP rəsmisi əlavə edib.
Onun fikrincə, müxalifət, o cümlədən Müsavat Partiyasının başqanı cəmiyyətə alternativ layihələr təqdim edə bilmir.
"Cəmiyyət İsa Qəmbəri boykot edib. Müxalifətin sosial bazası yoxdur. Azərbaycan vətəndaşları, bütün cəmiyyət prezident İlham Əliyevi dəstəkləyir və ona səs verəcək" - Novruzov əlavə edib.
Deputat deyib ki, müxalifətin sosial bazası olmadığından, müxtəlif bəhanələrlə aksiyalar keçirməkdən imtina edir. O, hakim partiyanın Bibiheybətdə aksiya keçirməsini nümunə hesab edir.
"Bakı Şəhər İcra Hakimiyyəti 11 yerdə meydan ayırıb və bu yerlər şəhərin bütün rayonlarını əhatə edir. Müsavat Partiyası da bir aksiya keçirib nümunə göstərsin. Müxalifət istəyir ki, vağzallarda, dayanacaqlarda, metro çıxışlarında aksiya keçirsin və təsadüfən orada olan insanları mitinq iştirakçısı kimi təqdim etsinlər", - deyə YAP rəsmisi əlavə edib.
Məqalə müəllifi ilə əlaqə ünvanı: [email protected]
