Azərbaycan, Bakı, 21 oktyabr/ Trend , müxbir R.Novruzov/ Gələn həftə Ermənistan-Azərbaycan, Dağlıq Qarabağ münaqişəsinin nizamlanması üzrə danışıqlar prosesinin fəallaşacağı gözlənilir.
ATƏT-in Minsk Qrupunun Fransa, Rusiya və ABŞ-dan olan həmsədrləri - Bernar Fasye, Yuri Merzlyakov və Metyu Brayza gələn həftə münaqişə regionuna baş çəkməyi planlaşdırırlar.
ATƏT-in Minsk Qrupunun Fransadan olan həmsədri Fasye çərşənbə axşamı telefonla Trend -a bildirib ki, bu, həmsədrlərin Azərbaycanda prezident seçkilərindən sonra regiona ilk səfərləri olacaq. Ölkədə prezident seçkiləri keçirilməsi səbəbindən danışıqlar prosesi dayandırılmışdı və indi həmsədrlər öz işlərini daha fəal şəkildə bərpa etmək niyyətindədirlər.
İki Cənubi Qafqaz ölkəsiarasında münaqişə 1988 - ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının 20%-i, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994 -cü ildə tərəflər atəşkəs rejiminə dair razılaşma əldə ediblər və o vaxtdan bəri, ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə, hələ ki nəticəsiz, sülh danışıqları aparılır.
"Gələn həftə biz münaqişə tərəfləri ilə görüşmək və öz işimizi davam etdirmək niyyətindəyik", - deyə Fasye bildirib.
Məqalə müəllifi ilə əlaqə ünvanı - trend
