Azərbaycan, Bakı, 27 oktyabr / Trend , müxbir A.Hüseynbala/ Azərbaycanda prezident seçkisini boykot edən Müxalifətin Əməkdaşlıq Mərkəzinin (MƏM) tərkibinin genişlənməsi ilə bağlı intensiv müzakirələr aparılmır.
"Biz indi yeni şəraitə uyğun yeni hədəflər müəyyənləşdiririk", - bazar ertəsi Trend - a Müsavat Partiyası Mərkəzi İcra Aparatının rəhbəri Arif Hacılı bildirib.
Trend - un arayışı: Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiaysı və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15- də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib.
Hacılı MƏM -in tərkibinin genişlənməsi üçün seçkilərdən sonra heç bir siyasi hərəkatla danışıqlar aparılmadığını da qeyd edib.
"Düşünürəm ki, Müxalifətin Əməkdaşlıq Mərkəzinə hər hansı partiyanın daxil olmasına indi ehtiyac yoxdur. Çünki Azərbaycanda bir - iki ciddi siyasi qüvvə var və onlar artıq birləşiblər. Kənarda elə bir ciddi siyasi qüvvə qalmayıb", - Müsavat funksioneri vurğulayıb.
Azərbaycanın müxalif Demokrat Partiyasının sədri Sərdar Cəlaloğlu həmkarının fikrinə sərt reaksiya verib.
"Bu həmin Müsavatdır və həmin Arif Hacılıdır ki, 2005 - ci il parlament seçkisindən sonra həm təkrar seçkilərə getməyin, həm də parlamentdə iştirak etməyin tərəfdarı kimi çıxış edirdi. Bu da həmin AXCP -dir ki, buna görə Arif Hacılını hökumətə işləməkdə ittiham edirdi", - bazar ertəsi Trend - a müxalif Azərbaycan Demokrat Partiyasının (ADP) sədri Sərdar Cəlaloğlu bildirib.
Cəlaloğlunun sözlərinə görə, belə dünyagörüşu onların Azərbaycan iqtidarından devrilməsinə və zəifləyib siyasi səhnədən çıxmaq təhlukəsi ilə üzləşmələrinə təkan verib.
"Arif Hacılının mövqeyi Müsavatda zəiflədikcə, ictimaiyyət arasında özünə qarşı mənfi rəy artıqca, radikal çıxışları çoxalır. Bunu normal qəbul edirəm", - ADP sədri deyib.
Cəlaloğlunun fikrincə, Müsavat, həqiqətən, ADP ilə bir yerdə olmağı istəmirsə, onda hər hansı birliyə də ehtiyac yoxdur. "Bizim Mərkəzə daxil olmağa heç bir marağımız yoxdur və həmin qurumu real güc mərkəzi də hesab etmirik", - Cəlaloğlu bildirib.
Məqalə müəllifi ilə əlaqə ünvanı: [email protected]